افغان حکومت: په څو اوونیو کې به له طالبانو سره مخامخ خبرې پیل شي
د افغانستان حکومت وایي، هیله مند دی چې په راتلونکو څو اوونیو کې د طالبانو او د افغانستان د حکومت ترمنځ مخامخ خبرې پیل شي.
د ولسمشر ویاند صدیق صدیقي نن په کابل کې په یوه خبري غونډه کې وویل چې تمه ده چې د سپټمبر تر میاشتې د سولې یوه ابتدایي موافقه جوړه شي چې دده په وینا، د طالبانو او د حکومت ترمنځ د مخامخ خبرو پیلېدل به یې یوه برخه وي.
ده زیاته کړه: د افغانستان د حکومت له لومړیتوبونو یوه هم د سولې پروسه ده، موږ هیله مند یوو چې تر راتلونکو څو اوونیو پورې په دې برخه کې د پرمختګونو شاهدان واوسو، ترڅو د دې پروسې یوې بلې مرحلې ته چې هغه د افغانستان د حکومت او طالبانو ترمنځ مخامخ خبرې دي، داخل شو.
د صدیقي په وینا، هره پرېکړه چې د افغانستان د خلکو او حکومت له خوا کېږي، هغه به د نویو ارزښتونو او ګټو پر خوندي کولو ولاړه وي.
طالبانو چې تر اوسه یې له امریکایي لوري سره اووه ځلې خبرې کړي، د افغانستان له حکومت سره له مخامخ خبرو کولو یې ډډه کړې ده.