"یوه امریکايي پوځي د ټرمپ او زیلنسکي پر خبرو خپله اندېښنه امنیت شورا ته رسولې وه"
د امریکا یو پوځي چارواکی چمتو شوی چې ووايي د پخواني مرستیال ولسمشر او په انتخاباتو کې د ولسمشر ډونالډ ټرمپ د احتمالي سیال جوبایډن په اړه له اوکراین څخه د تحقیقاتو د غوښتنې په اړه یې دوه ځلې اندیښنه څرګنده کړې ده.
د هغه بیان له مخې چې د امریکا د ملي امنیت په شورا کې د اروپايي چارو مسوول ډګرمن الکساندر وینډمن نن سه شنبې (اکټوبر ۲۹مه) د کانګرس د استیضاح له طرحې سره سم چمتو کړی دی، هغه د اوکراین له ولسمشر ولادیمیر زیلینسکي سره د ښاغلي ټرمپ ټلفوني مکالمه اورېدلې ده.
اسوشېټډ پریس خبري آژانس چې د بیان متن یې لیدلی لیکلي، نوموړی به کانګرس ته ووايي چې د جولای په ۲۵ مه له دې مکالمې وروسته، ده په دې اړه خپله اندېښنه دوه ځلې امنیت شورا ته ورسوله.