ژمني توفان اروپا کې ۶ کسان وژلي
د دې توفان په نتېجه کې د یو شمېر نورو کسانو د ټپي کېدو راپورونه هم ورکړل شوي.
د سیاره په نوم دا توفان د فبرورۍ په ۹ مه انګلستان او اېرلنډ څخه وروسته ختېځ خواته ولاړ چې په اروپا کې یې د لسګونو زرو کورونو د برېښنا بهیر پرچاو کړ.
دې توفان په سفر هم اغېز کړی او له کبله یې په اروپا کې سلګونه الوتنې لغوه شوې دي.
د جرمني په ۴ ښارونو فرانکفورت، مونشن، دوسیلدورف او کولن کې تر ۷۰۰ زیاتې الوتنې لغوه شوي دي.
د هالنډ په امسټرډام هوايي ډګر کې چې د اروپا یو له بوختو هوايي ډګرونو څخه دی، د دوشنبې په ورځ ۲۲۰ هغه الوتنې چې نورو اروپايي ښارونو ته وې لغوه شوې.
د هوا د اټکل ادارو د سویډن، ناروې، ډنمارک او فنلنډ په سواحلو کې د اوبو د سطحې د پورته کېدو خبرداری هم ورکړی دی.