افغانستان کې پر کورنیو کرنیزو محصولاتو ټرانسپورتي کمېشن معاف شو
د افغانستان ټرانسپورت وزارت وايي، سر له سبا له ولسوالیو نه ښارونو ته د کورنیو کرنیزو محصولاتو له لېږد څخه، ټرانسپورتي کمېشن نهاخیستل کېږي.
د ټرانسپورت وزارت سرپرست محمد یما شمس دا خبره د سې شنبې په ورځ «۱۳۹۹ کال د غويي ۰۲» یوې خبري ناستې ته وکړه ویېویل، سره له دې چې دغه تصمیم پر ملي عوایدو اغېز کوي، خو په روانو حالاتو کې له خلکو او خصوصي سکټور سره د مرستې په خاطر نیول شوی دی.
ښاغلی شمس وايي: "اوس د افغانستان په ۳۴ ولایتونو او ټولو ولسوالیو کې، هره نقلیه واسطه چې پرته له ساختماني موادو، کرنیز او داسې نور کورني محصولات له یوې سیمې نه بلې ته انتقالوي، په مطلق ډول له ټرانسپورټي کمېشن نه معاف دي."
ښاغلي شمس وویل، د دوی د معلوماتو له مخې پخوا تر دې د افغانستان په څه کم ۲۰۰ سیمو کې د دغو توکو له لېږدوونکو وسایطو څخه پیسې اخیستل کېدې.
د افغانستان د سوداګرۍ او پانګونې خونه سره له دې چې د ټرانسپورت وزارت دغه اقدام ستايي، خو وايي که حکومت له بزګرو، باغ لرونکو او په ټوله کې تولیدوونکو ته اسانیتاوې برابرې او مرستې ورسره وکړي، هېواد به په لږه موده کې د کرنیزو محصولاتو له امله پر ځان بسیا شي.