په تونس کې د ډیموکراسۍ پلوه پاڅون لسمه کلیزه ولمانځل شوه
په تونس کې د ډیموکراسۍ پلوه پاڅون لسمه کلیزه پرون د کرونا وایروس د محدودیتونو له کبله په مختصره توګه ولمانځل شوه.
دغه پاڅون د دې سبب شو، چې د دغه هېواد زورواکی له واکه وپرځول شي او په عرب هېوادونو کې د ناکراریو څپه پیل شي.
په تونس کې د هغه څلور-ورځني ټولبند له کبله چې له پرونه نافذ شو، مظاهرې منع دي.
لس کاله مخکې د تونس ولسمشر، زین العابدین بن علي تر پراخو مظاهرو وروسته له واک څخه لیرې او په ۲۰۱۹م کال په جلاوطنۍ کې مړ شو.
دغه مظاهرې وروسته له هغې پیل شوې چې یوه نهیلي، ځوان هټیوال د پولیسو د زورزیاتي له کبله، ځان ته اور واچاوه.