د سولې په تړاو نوې هیلې؛ "ډېر ژر به دوحه کې د مرکچي پلاوو تر منځ خبرې پیل شي"
د دغه وزارت ویاندې ناجیې انوري نن د سې شنبې (د غبرګولي ۴مه) په ورځ ازادي راډیو ته وویل، دغه وزارت دوحې ته د افغان سولې د مرکچي پلاوي د هغو غړو د بیا استولو د تخنیکي او لوژستیکي اسانتیاوو په برابرولو کار پیل کړی چې دا مهال افغانستان کې دي.
اغلې انوري زیاته کړه: "د افغانستان اسلامي جمهوریت د مذاکراتي پلاوي ځینې غړي چې اوس په افغانستان کې دي، د سولې په چارو کې د دولت وزارت د هغوی د تخنیکي او لوژستیکي اسانتیاوو د برابرولو لپاره پوره کار کوي او په نږدې راتلونکي کې به دغه پلاوی بېرته د مذاکراتو ځای ته لاړ شي او مذاکرات به له هغه ځایه چې درېدلې وه، پیلوي."
اغلې انوري وایي، له اختر وروسته د افغان دولت او طالبانو د ځینو مرکچي پلاوو د غړو تر منځ یوه رسمي او څو غیر رسمي ناستې شوي چې د مذاکراتو د ژر پیل او چټکتیا په اړه په کې ټینګار شوی دی.
داسې راپورونه موجود وو چې له کوچني اختر وروسته به د سولې لپاره د ترکیې د ناستې نېټه هم مشخصه شي، خو د سولې چارو وزارت وایي، لا د دغې ناستې وخت نه دی مشخص شوی.
د دغه وزارت ویانده ناجیه انوري وايي، افغان حکومت ورته پوره چمتوالی لري.
طالبان هم وایي، د بین الافغاني خبرو اترو د بېرته پیل لپاره چمتو دي.
د دغې ډلې یو ویاند ذبیح الله مجاهد ازادي راډیو ته وویل: "له روژې او اختر وروسته زموږ د مذاکراتي ټیم سفرونه پای ته رسېدلي او اوس خپل ځای کې دي، نو د مذاکراتو جریان به انشاءالله د دواړو خواوو د ټیمونو په موافقه پرمخ ځي."
د افغان حکومت او طالبانو د مرکچي پلاوو ترمنځ له څه باندې درېیو میاشتو راهیسې د بین الاقغاني مذاکراتو لړۍ درېدلې ده.
افغان حکومت او طالبان په داسې وخت کې د بین الافغاني مذاکراتو د بېرته پیل لپاره چمتوالی ښیي چې د ځینو نورو هېوادونو چارواکو هم د افغان جګړې پر سیاسي حل ټینګار کړی.
تازه د روسیې د بهرنیو چارو وزیر سرګي لاوروف له ټاس خبري اژانس سره مرکه کې ویلي، طالبانو ته مو په واضح ډول ويلي، افغانستان کې يې د واک د انحصار کولو د هڅو مخالف يو.
لاوروف دا هم ويلي چې مسکو د زور له لارې واک ته د رسېدو سره هېڅکله موافق نه دی.
د پاکستان د بهرنیو چارو وزير شاه محمود قریشي بیا له امریکا غږ ټلوېزیون سره په مرکه کې ویلي، د پاکستان حکومت حاضر دی چې د افغانستان د حکومت په خوښه همکاري وکړي.
ښاغلي قریشي ټینګار کړی چې پاکستان هڅه کوي د افغانستان د جګړې لپاره مثبت رول ولوبوي، خو په خبره یې دا د افغانستان واک دی چې د خپل هېواد راتلونکی او سیاسي حل څه ډول غواړي؟
تېره ورځ ناوخته ناوخته ولسمشر محمد اشرف غني هم د سعودي عربستان پاچا خادم الحرمین الشریفین اعلیحضرت ملک سلمان بن عبدالعزیز سره ټیلیفوني خبرو کې د افغانستان او سعودي عربستان ترمنځ اړیکو، د افغانستان سولې پروسې او سیمه ییزو مسایلو په اړه خبرې کړي دي.
د یادونې وړ ده چې له افغانستانه د سېپټمبر تر ۱۱مې نېټې پورې د ټولو بهرنیو ځواکونو د وتلو په اړه اعلان سره په دغه هېواد کې جګړو او تاوتریخوالي زور اخیستی.
طالبان د امریکا د متحده ایالاتو دا پرېکړه د دوحې هوکړې خلاف ګڼي.
د امریکا او طالبانو تر منځ د دوحې په هوکړه کې راغلي چې بهرني ځواکونه به ټول په مې میاشت کې له افغانستانه وځي.