طالبان: شېر محمدعباس ستانکزی په ایران کې دی
په قطر کې د طالبانو د سیاسي دفتر ویاند محمدنعیم په یوه بیان کې چې نن چهارشنبه (د چنګاښ په ۱۶مه نېټه) سهار خپور شو ایران ته د دې پلاوي د سفر دقیقه نېټه نه ده ښودلې، خو ویلي یې دي چې پلاوی له ایراني چارواکو سره د اړوندو او دوه اړخیزو موضوعاتو د څېړلو په موخه دې هېواد ته تللی دی.
په بیان کې راغلي چې د طالبانو پلاوی به نن له ځینو افغاني شخصیتونو سره هم یوه تفاهمې ناسته ولري او له هغو سره به د هېواد د روان وضعیت او د خبرو له لارې د ستونزو د اوارۍ په موخه خبرې وکړي.
افغان چارواکو د ایران ته د طالبانو د پلاوي د سفر په اړه تراوسه څه نه دي ویلي.