د بنګلهدېش یوه فابریکه کې د وروستۍ اورلګېدنې په تړاو ۸ کسان نیول شوي
د پلازمېنې ډاکه په څنډه کې دغه اور د پنجشنبې ناوخته په پنځه منزله فابریکه کې پیل شو چې تر ډېرهیې تور لوګي او لوخړې پورته کېدې.
د جمعې پر ماسپښین د اور تر مړه کولو وروسته، پولیسو په فابریکه کې ګڼ مړي پیدا کړل.
د نارایانګانج سیمې د پولیسو امر جید العلم پرون شنبه د ټیلیفون له لارې اسوشیټډ پرس اژانس ته وویل، په دې اورلګېدنه کې د قتل په تړاو اته کسان نیول شوي او د پولیسو په توقیف کې دي.
د بنګلهدېش د کورنیو چارو وزیر اسد الزمان خان ویلي، په نیول شویو کسانو کې د ساجیب شرکت چې دغه فابریکهیې مربوط ده، اجرائیه مدیر هم شامل دی.
د بنګلهدېش د کورنیو چارو وزیر په دې اړه نور جزئیات ورنهکړل، خو ویلي یې دي، په دې قضیه کې دخیل کسان به مجازات شي.
اسد الزمان خان پرون د پېښې د ځای تر کتنې وروسته له رسنیو سره په خبرو کې دا پېښه د قتل په نوم یاده کړه.
پرون ماښام د ډاکه یوې محکمې اجازه ورکړه چې اته مشکوک نیول شوي کسان دې د پوښتنو ګروېږنو د دوام لپاره څلور ورځې د پولیسو په توقیف کې وي.
د اسوشیټډ پرس اژانس په لیکنه، بنګلهدېش هغه هېواد دی چې په صنعتي برخه کې د دغسې غموونکو پېښو سابقه لري چې په فابریکو کې اورلګېدنه او په دغو فابریکو کې د راګېر پاتې شویو کارګرانو مړینه هم پهکې شامله ده.
په دې ته ورته مواردو کې، د فابریکو خاوندان د ناغېړۍ له کبله د قصدي وژنو له تورونو سره مخامخ شوي دي، ځکه د کار او تولیدي ساعتونو پر وخت د فابریکو د دروازو قلف کول غیر قانوني کار دی.
په ۲۰۱۲م کال کې په ډاکه ښار کې د کالیو د تولید د یوې فابریکې د قلف شویو دروازو تر شا ۱۱۷ کارګران راګېر پاتې شول او ساهیې ورکړه.