چارواکي: حیرتان بندرته د چینایي توکو سوداګریزو محموله راورسېده
د افغانستان د صنعت او سوداګرۍ وزارت وايي, په روان لمرېز کال کې حيرتان بندر ته د چينايي سوداګريزو توکو لومړنۍ محموله تېره ورځ را ورسېده.
د دغه وزارت ویاند فواد احمدي ازادي راډیو ته وویل، په دغې محموله کې ۵۱ کانټینرونه شامل دي چې څه موده وړاندې یې د چین له ارومچي ښاره یې افغانستان ته حرکت کړی و.
د نوموړي په وینا په دې محموله کې برښنایي توکي، ارايشي او د سينګار محصولات، د ښځو ماشومانو او سړيو بېلابېل ډول جامې، د ماشومانو د لوبو سامانونه او نور سوداګريز توکي شامل دي.
په دې وروستیو کې د افغانستان او چین ترمنځ سوداګریزې راکړې ورکړې ښه وده کړې، د افغانستان د صنعت وزارت وايي چې د تېرلمریز کال د لومړۍ ربعې پرتله روان کال په همدومره موده کې له افغانستانه چین ته په صادراتو کې ۶۴ سلنه زیاتوالی راغلی.