راپورونه: طالبانو پر مزارشریف ښار پراخې حملې پیل کړي
په سیمه کې د ازادي راډیو خبریال وايي چې طالبانو له درېیو اړخونو پر دې ښار حملې وکړې: "طالبانو پر مزارشریف ښار له درېیو خواوو چې یوه د نهرشاهي ولسوالۍ د لنګر خانې سیمه ده، دوهمه د دهدادي ولسوالۍ د توختې سیمه او درېیمه یې د بلخ ولسوالۍ د څلور لارې او د ښار د لویدیځ لوري دروازه ده، پر افغان ځواکونو حملې پیل کړې."
د بلخ د امنیه قوماندانۍ ویاند عادل شاه عادل ازادي راډیو ته وویل چې په دې نښتو کې طالبانو ته درنه مرګ ژوبله اوښتې ده.
ولسمشر اشرف غني د چهارشنبې په ورځ مزارشریف ته تللی و او د دې ولایت له چارواکو سره یې د طالبانو د حملو پر وړاندې پر دفاع ټینګار وکړ.