تازه طالبانو د افغانستان د ۵ ولایتونو پر مرکزونو بریدونه پیل کړي
د پکتیکا ښرنه، د پکتیا ګردېز، د میدان وردک میدان ښار، د فاریاب میمنه او د بلخ مزار شریف هغه ښارونه دي چې دې ډلې هڅه کړې، تر واک لاندې یې راولي.
خو دا ډله دعوه کوي چې د پکتیکا مرکز ښرنه ښار یې نیولی دی.
طالبانو د دې ښار یوه ویډیو خپره کړې چې په کې لیدل کېږي، وسلهوال یې په ښرنه ښار کې ګرځي او د ټول ولایت د نیولو دعوه کوي.
په ورته وخت کې د پکتیکا ولایت دننه یوې مهمې سرچینې ازادي راډیو ته ومنله چې طالبانو د ښار یوه برخه نیولې او چارواکو نظامي قرارګاه ته شاتګ کړی.
خو طالبان د پاتې څلور ولایتونو د مرکزونو په نیولو بریالي شوي نه دي، خو د پکتیا په مرکز ګردېز او میدان ښار کې سخته جګړه روانه ده.
د افغانستان د کورنیو چارو وزارت هم مني چې طالبانو په دې ښارونو بریدونه کړي، خو زیاتوي، دې دلې ته يې درنه مرګ ژوبله اړولې او په شا یې تمبولي دي.
د کورنیو چارو وزارت ویاند میرویس ستانکزي ازادي راډیو ته وویل، په دې ښارونو کې د افغان ځواکونو تر څنګ ولسي پاڅون کوونکي له طالبانو سره په جګړه بوخت دي: "د ښرنې په شااوخوا کې زموږ کافي قوتونه شته. په مزار شریف کې بیا له بل هر ځایه ډېر زموږ ولسي ملاتړي، امنیتي او دفاعي ځواکونه او سیاسي او نظامي رهبري هلته شتون لري. د فاریاب پر مېمنې دوی تېره شپه برید وکړ. زموږ امنیتي ځواکونه وتوانېدل د دوی برید په شا وتمبوي. امنیتي او دفاعي ځواکونه او ولسي ملاتړي یې وتوانېدل چې د یوه سر ګروپ قاري شعیب په ګډون تر ۴۰ طالبانو ته مرګ ژوبله واړوي."
د افغانستان په لویدیځ او شمال کې د جګړو ور هاخوا، د هېواد ختیځ ته هم د جګړې لمن پراخه شوې.
په سیمه کې سرچینې ازادي راډیو ته وايي، دې ډلې تېره شپه په کونړ کې درې ولسوالۍ نیولي دي.
سرچینه وايي، طالبانو تېره شپه له یوه څه مقاومته وروسته، د اسمار ولسوالۍ ونیوله، خو په ګاونډ کې پرته دانګام او بیا شلتن ولسوالۍ له کوم مقاومت پرته دې ډلې نیولې دي.
دا په په شمال، شمال ختیځ او لویدیځ کې د طالبانو د پراخ پرمختګ ورووسته، د افغانستان په خیتځ کې د طالبانو مهم پرمختګ یادېږي.
د دې تر خوا په ننګرهار کې هم د طالبانو او افغان حکومت ترمنځ نښتې شوي.
د دې ولایت په شېرزادو ، اچین او سپین غر ولسوالیو کې هم نښتې شوي چې خکومت په کې طالبانو ته د درنې مرګ ژوبلې خبره کوي.
طالبانو لا په دې اړه څه نه دي ویلي.
دا بریدونه داسې مهال کېږي چې طالبانو له وړاندې په شمال، شمال ختیځ او لویدیځ کې ۱۸ ښارونه نیولي او له حکومت یې غوښتي چې کابل هم ور پرېږدي، خو افغان حکومت پرون پرېکړه کړې چې د دې ډلې پرضد به جکړه کوي او مقاومت به یې دوام ولري.