ناټو: پردې کار کوو چې څنګه طالبان د خپلو ژمنو په اړه حساب کتاب ته کینووو
ینس سټولټنبرګ په ځانګړي ډول د طالبانو د هغو ژمنو یادونه وکړه چې له امریکا سره د سولې په تړون کې یې کړې وې: "اوس موږ د ناټو له متحدانو او شریکانو سره په دې اړه سلامشورې کوو چې څنګه د طالبانو رژیم د خپلو هغو ژمنو د عملي کولو لپاره حساب کتاب ته کېنوو چې د ترورېزم په برخه کې یې کړې وې- دا چې اجازه به نه ورکوي چې افغانستان یوځل بیا د نړیوالو تروریستانو په ځاله بدل شي او همدا راز هغه ژمنه چې بشري حقونو ته به درناوي کوي او هغو کسانو ته به د خوندي وتلو اجازه ورکوي چې ژوند یې هلته په خطر کې دی."
ښاغلي سټولټنبرګ وویل، ناټو پر دې کار کوي چې پاتې افغانان څنګه له افغانستانه وباسي او زیاته یې کړه چې د راوتلو افغانانو د ځای پرځای کولو کار روان دی.
سټولټنبرګ د ناټو د هغو متحدانو مننه وکړه چې زرګونه افغان کډوالو او د هغوی کورنیو ته یې پناه او ځای ورکړي.
همدا راز د متحدو ایالاتونو دفاع وزیر لوېډ اسټن خبریالانو ته په څرګندونو کې د هغو افغانانو د اېستلو په برخه کې د هڅو ډاډ ورکړ چې په افغانستان کې یې له امریکایانو سره کار کړی خو تراوسه هلته پاتې دي.
اسټن زیاته کړه: "موږ خپل کار ته دوام ورکوو څو دا ډاډ ترلاسه شي چې هغه خلک چې له موږ سره یې همکاري کړې ده دا فرصت ولري څو په هغه صورت کې چې وغواړي، له افغانستانه ووځي. موږ په لومړي ګام کې په ۱۷ ورځو کې شاوخوا ۱۲۴ زره کسان له افغانستانه راواېستل او په دې کار ځکه وتوانېدو چې له موږ سره په دې ټلواله کې شاملو شریکانو او متحدانو مرسته وکړه."
تر اوسه دقیقه معلومه نه ده چې په کوم شمېر افغانان چې د امریکا او ناټو له ځواکونو سره یې په افغانستان کې کار کړی، لا هم هلته پاتې دي خو د راپورونو له مخې له ځینو هوايي ډګرونو څخه د تخلیې بهیر اوس هم روان دی.
په دې ترڅ کې د پنجشنبې په ورځ ۵۷ تنه افغانان چې ډېری په کې د افغانستان د فوټبال او باسکټبال د ټیمونو ښځينه غړې شاملې وې، قطر ته ورسېدل.