بغداد کې د مظاهرو په ترڅ کې د مرګ ژوبلې په اړه څېړنې پیل شوي
د عراق په پلازمېنه بغداد کې د پرونیو مظاهرو په ترڅ کې د مرګ ژوبلې په اړه څېړنې پیل شوې دي.
د ایران پلوو شیعه معترضانو او د بلوا ضد پولیسو ترمنځ د پرونيو نښتو په ترڅ کې یو اعتراض کوونکی ووژل شو او لسګونه نور ټپیان شول.
د دې پېښو په اړه د تحقیقاتو امر د عراق صدراعظم مصطفی کاظمي کړی و.
اعتراض کوونکو چې د تېرې میاشتې د پارلماني انتخاباتو نتایج نه مني، له څه باندې درې اونیو راهیسې د بغداد زرغونې سیمې ته څېرمه پرلت وهلی.
پولیسو پرون وروسته له دې چې معترضانو په کاڼو وویشتل او زرغون زون ته د ننوتو هڅه یې وکړه اوښلن ګاز وکاراوه او هوایي ډزې یې وکړې.
د عراق روغتیا وزارت د لږ تر لږه ۲۷ ملکیانو او ۹۸ امنیتي سرتیرو د ټپي کېدو خبر ورکړی دی.
متحدو ایالاتونو، ملګرو ملتونو او نورو هېوادونو د عراق د اکتوبر د لسمې نېټې انتخابات چې تر ډېره له شخړو او تخینکي ستونزو پرته ترسره شول ستایلي.