د ښځو خوځښت: د طالبانو پر وړاندې د نړیوالو او ملګروملتونو چوپتیا 'شرم' ده
د افغانستان د مقتدرو ښځو خوځښت وايي، د طالبانو پر وړاندې د نړیوالې ټولنې او ملګرو ملتونو چوپتیا د شرم وړ خبره ده.
دغه خوځښت د یوه پرېکړه لیک په خپرولو سره وایي، ژر تر ژره دې د پوهنتونونو او ښوونځیو برخلیک معلوم شي او افغان نجونو او ښځو ته دې، د زده کړو او کار اجازه ورکړل شي.
رخشانه رضایي د افغانستان د مقتدرو مېرمنو د خوځښت غړې وایي: "طالبان افغان مېرمنې داسې په تکلیفوي چې د بدویت په دوره کې او له اسلام دین څخه مخکې هم نه وې شوې؛ موږ له طالبانو غواړو چې داسې افراطي فکرونو ته د پای ټکی کیږدي."
په پرېکړه لیک کې راغلي چې افغان ښځې کله هم د طالبانو نظام په رسمیت نه پېژني او دا نطام یو تور، د ښځو ضد او د بشر ضد نظام یادوي.
په افغانستان کې د طالبانو په راتګ سره له شپږم ټولګي پورته نجونو ته ښوونځي ته د تګ اجازه نه ده شوې، ډېری دولتي کارکوونکي په کور کینول شوي، بې محرمه د لېرې واټن په سفر یې بندیز لګول شوی او تازه د کابل ښار ځینو سیمو کې د طالبانو د حکومت له خوا داسې پوسټرونه لګول شوي چې په کې د ښځو په حجاب ټینګار شوی دی.
په ورته وخت کې د شنبې په ورځ (د مرغومي ۱۸مه) د عدالت او ازادي لپاره د افغانستان د ښځو خوځښت په یوه غونډه کې ادعا وکړه چې بشري مرستې په ناعادلانه توګه او قومي، مذهبي او سمتي موضوعاتو ته په پام سره وېشل کېږي.
دوی وایي، ډېری بشري مرستې هغو سیمو سره شوي چې ډېری کسان يې د طالبانو په لیکو کې لري.
د عدالت او ازادۍ لپاره د افغانستان د ښځو خوځښت غړې شمایل توانا وایي: "ښځې د دې مرستو مستحق دي، ځکه هغوی خپل پلار، خاوند او وروڼه په جنګونو کې له لاسه ورکړي، موږ له ملګرو ملتونو او نړیوالې ټولنې غواړو چې داسې مېکانېزم جوړ کړي چې مرستې اړمنو کسانو ته ورسېږي."
دوی هم د یوه پرېکړه لیک په خپرولو سره وایي، د هغو ولایتونو او ولسوالیو نوملړ دې خپور شي چې ورسره بشري مرستې شوي، بې وزلو کورنیو ته دې لومړیتوب ورکړل شي او افغانستان کې دې له یو بشري ناوړین مخنیوی وشي.
په لومړنۍ غونډه کې د ګډون کوونکو ښځو شمېر په تصویر کې ۱۲ تنه لیدل کېږي، خو د دوهمې غونډې تصویر او د ګډونوالو شمېر ازادي راډیو سره نه دي شریک شوي.
خو د طالبانو د ویاند مرستیال بلال کریمي وایي، بشري مرستې په شفافه توګه وېشل شوي دي.
نوموړی دغه شان وایي، د طالبانو تازه سپارښتنې هم د اسلام له نظره او د ټولنې د اصلاح لپاره رامنځته شوي دي.
کریمي زیاته کړه: "د اسلامي امارت د معیاري فعالیتونو ترسره کولو ته ژمن دی او د دعوت او ارشاد وزارت له لوري د توصیو په اړه چې یادونه یې کېږي دا د ټولنې د اصلاح لپاره شوي دي."
دا په داسې حال کې ده چې د بښنې نړیوال سازمان په افغانستان کې د ښځو له اعتراضونو سره یو وار بیا د پیوستون غوښتنه کړې ده.
دغه سازمان پرون په خپل ټویټر کې د ښځینه معترضانو د یوې ویډیو ترڅنګ لیکلي، افغان مېرمنې د طالبانو تر واکمنۍ لاندې د خپلو بنسټیزو حقونو لپاره خپلو اعتراضونو ته دوام ورکوي.
دغه سازمان په یوه انلاین کمپاین کې له خلکو غوښتنه کړې چې له افغان ښځو سره د پیوستون لپاره خپل غږ ملګری کړي.
پرون هم په کابل کې یو شمېر ښځې په یوه کور کې په اعتراض راټولې شوې وې او ویل یې چې دوی د طالبانو د حکومت له خوا پر دوی د لګول شوېو محدودیتونو پر وړاندې غلې پاتې نه شي.
خو دا په داسې حال کې ده چې مخکې تر دې د دوی د یو شمېر اعتراضیه غونډو او لایونونو مخه د طالبانو د حکومت له خوا نیول شوې هم ده.