لویدیځ هېوادونو 'سوېفټ' سیسټم ته د ځینو روسي بانکونو لاسرسی بند کړ
د امریکا یو لوړپوړی چارواکی وایي، له سوېفټ یا د پیسو د لېږد له نړیوال سیسټمه د روسیې د یو شمېر بانکونو اېستل، پر روسیې د لګول شوېو بندیزونو تر ټولو سخت ګزار دی.
پر روسیې د بندیزونو دا موافقه د امریکا، اروپایي ټولنې، بریتانیا، جرمني، فرانسې، ایټالیا او کاناډا له خوا شوې ده.
سوېفټ د پیسو د لېږد ترڅنګ د پیغام رسولو یو نړیوال سیسټم هم دی چې د نړۍ په کچه زرګونه مالي موسسې له یو بل سره وصلوي.
د دغه سیسټم مرکز د بلجیم په پلازمېنه بروکسل کې دی چې ۱۱ زره مالي بنسټونه او ۲ سوه هېوادونه او سیمې سره نښلوي او بانکونو ته د پیسو د انتقال معلومات ورکوي.
پر روسیې دا بندیزونه تېره ورځ اعلان شول او په دې اقدام کې ښکېلو هېوادونو ویلي چې دا کار به د روسیې د مالي دفاع سیستم کمزوری او روسي روبل به "ازاد سقوط" خواته بوځي.
د اروپایي ټولنې د کمېسیون مشرې اورزلا ون دیرلین ویلي، دا بندیزونه به نړیوال مالي سیسټم ته د روسي بانکونو لاسرسی محدود کړي او دوی به دا وړتیا ونه لري چې په نړیواله کچه فعالیت وکړي.
نوموړې که څه هم ونه ویل چې د روسیې کوم بانکونه به دغو بندیزونو کې شاملېږي، خو زیاته یې کړه چې دوی به دې لېست کې ډېر بانکونه شامل کړي.
د بندیزونو له دغه اقدامه به د روسیې یو شمېر بانکونو ځکه مستثنا وي چې نړۍ وکولی شي روسیې ته د ګازو او تېلو پیسې ولېږدوي.
د یادولو وړ ده چې روسیه اروپا ته د انرژۍ تر ټولو ستر صادرونکی هېواد دی.
امریکایي چارواکو ویلي، دا بندیزونه به د روسیې مرکزي بانک پر لویدیځو هېوادونو د ۶۳۰ میلیارډه ډالرو په ارزښت د سرو زرو او بهرنیو اسعارو له خرڅلاوه منعه کړي.
دا هغه اقدام دی چې د اعلامیې له مخې کم وخت کې به یې اغېز محسوس وي او د روسیي روبل ارزښت به هم یو دم په ځمکه وولي.
دا اقدامات داسې مهال کېږي چې نن پر اوکراین د روسیې د یرغل ۴مه ورځ ده.
د اوکراین د پلازمېنې کیف اوسیدونکو ویلي، نن سهار وختي هم دغلته د یوې چاودنې او څو نورو درنو وسلو غږونه اورېدل شوي او د اوکراین دوهم لوی ښار خارکیف ته نژدې سخته جګړه روانه ده.