د طالبانو حکومت: د لرغونو اثارو او فرهنګي میراثونو ساتلو ته ژمن یو
په هغه نندارتون کې چې د یکشنبې په ورځ له فرهنګي میراثونو څخه د ساتنې د ملي ورځې د نمانځلو په هدف د افغانستان په ملي موزیم کې جوړ شوی و، د طالبانو حکومت چارواکو وویل چې د لرغونو اثارو او فرهنګي میراثونو ساتلو ته ژمن دي.
د طالبانو حکومت ویاند او د اطلاعاتو او فرهنګ وزارت مرستیال ذبیحالله مجاهد لرغوني او تاریخي اثار د افغانستان د ملي هویت ښکارندوی وبلل.
ښاغلي مجاهد زیاته کړه: "هغه اثار چې له پخوا موږ ته پاتې دي، د دغو اثارو ساتل، له مثبتو ټکو څخهیې استفاده او له منفي ټکو څخهیې ځان ساتل زموږ دنده ده او دا به راتلونکو نسلونو ته هم انتقال شي."
ښاغلی مجاهد وایي چې مس عینک کان ته څېرمه ډېر لرغوني اثار ترلاسه شوي او ډېر ژر به ملي موزیم ته وسپارل شي.
د طالبانو حکومت د اطلاعاتو او فرهنګ وزارت بل مرستیال سعدالدین سعید وویل چې تر اوسه په ۳۰ مواردو کې د لرغونو او تاریخي اثارو د قاچاق مخه نیول شوې ده.
ښاغلی سعید وايي: "د لرغونو اثارو د قاچاق د شااوخوا ۳۰ مواردو قضیې موږ ته رارسېدلي چې د اطلاعاتو او فرهنګ وزارت ترڅنګ د اسلامي امارت ګڼو ادارو یې مخه نیولې. کوم اثار چې لاس ته راغلي، هغه مو ملي موزیم ته چې د فرهنګي اثارو کور او زموږ د ملي هویت ښکارندوی دی، سپارلي دي."
له فرهنګي میراثونو څخه د ساتنې ملي ورځ په داسې حال کې په افغانستان کې نمانځل کېږی چې طالبانو د خپل لومړي ځل واکمنۍ پر مهال، د ۱۳۷۹ کال د حوت میاشتې په ۲۱مه نېټه د بامیانو دوه مجسمې چې یوې ۵۵ متره او بلې یې ۳۵ متره لوړوالی درلود، لهمنځه یوړې.
یونسکو د دغو لرغونو اثارو لهمنځه وړل فرهنګي قتل عام بللی و.
د طالبانو حکومت ویاند او د اطلاعاتو او فرهنګ وزارت مرستیال ذبیحالله مجاهد څه موده مخکې ازادي راډیو ته ویلي و چې د بامیانو بوتان د هغه مهال د محکمې د پرېکړې پر بنسټ ونړول شول.