د نورستان په ځنګلونو کې د اور دوام؛ خلکو يې د ژر مهارولو غوښتنه وکړه
د نورستان یو شمېر اوسېدونکي وايي، که د دې ولایت د ځنغوزیو او نښترو په ځنګلونو کې لګېدلی اور مهار نهشي، ښايي د کونړ او لغمان ځنګلونو ته هم ورسیږي.
د اوه ورځو په تېرېدو سره د ختیځ ولایت نورستان په واما او نورګرام ولسوالیو کې د ځنغوزیو او نښترو په ځنګلونو کې لګېدلی اور لا هم نه دی مهار شوی.
د سیمې اوسېدونکي اندېښنه لري چې د اور له امله ښايي د یاد ولایت د ځنغوزیو ځنګلونه لمنځه لاړ شي.
که څه هم سیمه ییزو اوسېدونکو د د اور وژلو هڅه کړې ده خو د دوی په وینا نه دي توانېدلي.
د نورستان اوسېدونکي امان الله عنایت وايي: "تر اوسه اور نه دی مهار شوی، ځکه د جوزا میاشت ده، هوا هم تېزه ده، اور ډېر شدت لري، په ډېر سرعت او تېزۍ له یوې سیمې بلې ته انتقالیږي، او د اور د وژلو هیڅ وسایل سیمې ته نه دي انتقال شوي او د اور وژل د ولسونو له توانه هم وتلي دي."
عبدالرحمن د نورستان ولایت بل اوسېدونکی د لګېدلي اور په اړه وايي: "ډېر شدید اور دی، نږدې یولس یا دولس سوه جریبه ځنګل يې لاندې دی کړی، د دې اور کنترول زموږ او د محلي حکومت له توانه بهر کار دی باید د کنترول په برخه کې يې مرکزي حکومت لاس په کار شي."
د نورستان اوسېدونکي وايي، که د دغه اور مخه ونه نیول شوي نو د لغمان او کونړ ځنګلونه به هم د اور خوراک شي.
د نورستان ولایت لپاره د طالبانو د اطلاعاتو او فرهنګ سرپرست رییس سمیع الحق حق بیان بیا د دغه اور د وژنې په اړه ازادي راډیو ته وویل: "له بده مرغه تېره شپه د تېز باد او شمال له امله اور یو وار بیا زیات شوی دی، له ننګرهاره د اور وژنې عمله سیمې ته رسېدلې ده او د سیمه ییز ځواکونه هم هلته شته، ان شا الله ژر به اور کنترول او دا ستونزه به پای ته ورسیږي."
د طالبانو د حکومت له طبیعي پېښو سره د مبارزې وزارت مسؤلان هم د اور شدت تاييدوي خو وايي، د اور د وژلو په برخه کې د تازه پرمختګ په اړه معلومات نه لري.
که څه هم تر دمه د اور د لګېدلو اصلي لامل نه دی مالوم خو د نورستان یو شمېر اوسېدونکو ادعا کړې چې اور د ځنغوزیو د حاصل په سر د سیمه ییزو طالبانو د خپل منځني اختلافاتو له امله رامنځته شوی دی، هغه ادعا چې سیمه ییزو طالب چارواکو رد کړې ده.
نورستان د افغانستان په ختیځ کې پروت په ځنګلونو پوښل شوی ولایت دی چې ځنغوزي، غوزان او نښتر يې د خلکو د عاید ښه سرچینه بلل کیږي.