د طالبانو په بيا ځلې واکمنۍ کې په لومړي ځل يو هندی پلاوی کابل ته رسېدلی
په افغانستان کې د طالبانو حکومت وايي یو هندي پلاوی کابل ته رسېدلی او دغلته به له طالب مشرانو سره پر بېلابېلو موضوعاتو خبرې اترې وکړي.
د طالبانو په دويم ځلې واکمنۍ کې دا لومړی ځل دی چې هندي پلاوی کابل ته سفر کوي.
د طالبانو د حکومت ویاند ذبیح الله مجاهد د پنجشنبې په ورځ ازادي راډيو ته وویل:"کابل ته دهندوستان هېواد یو پلاوی راغلی دی، له مسولینو سره د لیدو کتنو پروګرام هم شته، اوس د بهرنیو چارو له وزیر سره لیدنه لري، جزییات به یې وروسته خپاره شي."
ښاغلي مجاهد د دغه هندي پلاوي د جوړښت په اړه څه ونه ویل خو د هند د بهرنیو چارو وزارت په یوه اعلامیه کې ویلي دي چې د دغه وزارت د یو لوړ پوړي سکرتر په مشرۍ یو پلاوی کابل ته رسېدلی دی.
په اعلامیه کې راغلي دي چې ددغه سفر هدف له افغانستان سره د هند لخوا د بشري مرستو چټکتیا، د هغه پروژو څخه لیدنه او څار چې مالي ملاتړ یې هند کوي او همدا راز د روغتیا په برخه کې له افغانانو سره مرسته ده.
په اعلامیه کې دا هم راغلي دي چې کابل ته دغه تللی پلاوی به له طالبانو سره دښو اړیکو د ټینګولو په هدف لیدنې هم ولري.
د اعلامیې په حواله دغه شان به هندي پلاوی د دې سفر په لړ کې د مرستندويه ادارو له استازو سره هم وویني چې د بشري مرستو د وېش مسولیت لري.
هند پر افغانستان د طالبانو د واکمنۍ له پیل راهیسې د بشري مرستو بېلابېلې کڅوړې دغه هېواد ته استولي چې غنم او درمل پهکې شامل دي.
کابل ته په داسې حال کې دغه هندي پلاوی سفر کوي چې له دې وړاندې په کابل کې د هند سفارت د بیا پرانيستل کېدو د شونتیا په اړه خبرونه خپاره شوي وو.
د هند د بهرنیو چارو وزارت ویلي و چې طالبان باید په کابل کې د هندوستان د سفارت امنیت خوندي کړي ترڅو دوی د افغانانو لپاره خپلې قونسلي چارې بېرته پیل کړي.
هندې پلاوی داسې مهال کابل ته سفر کوي چې همدا اوس په پلازمېنه کې د تحریک طالبان پاکستان او پاکستاني پلاوي ترمنځ مذاکرات روان دي.
تېره ورځ د قبایلي مشرانو یوه پنځوس کسیزه ډله چې زیاتره یې د پاکستان پخواني سناتوران، د ولایتي شورا غړي او ځینې قومي مشران دي کابل ته رسېدلی دی او د ټي ټي پي یا تحریک طالبان پاکستان له غړو سره يې د سولې اړوند خبرې اترې پیل کړي دي.
طالبانو د دغه پلاوی راتګ تاييد کړی او ویلي دي چې د حسن نیت له مخې د دواړو لوریو ترمنځ د سولې د خبرو کوربهتوب کوي.