پاکستاني پوځ بلوچستان کې عمليات پيل کړي
پاکستاني ځواکونو چې هلیکوپترونو یې ملاتړ کاوه، په بلوچستان کې عملیات پیل کړې دي. چارواکي وایي چې لږ تر لږه اووه بیلتون غوښتونکي یې وژلي دي.
پاکستاني چارواکو نن وویل چې پر دې عملیاتو یې وروسته تر دې لاس پورې کړ چې د پوځ یو افسر روانه اونۍ وسله والو برمته کړ.
شاوخوا پنځلس یاغیانو چې د پولیسو جامې یې په تن کې وې ډګروال لایق میرزا د سې شنبې په ورځ د زیارت په ښار کې د سفر پرمهال له موټره د کورنۍ له غړیو سره ښکته کړ، بیا یې د ده د کورنۍ غړي پرېښودل او ډګروال لایق یې له ځانونو سره بیولی.
وروسته یې وویل چې دا ډګروال یې وژلی دی.
د پوځ په وینا د تېرې شپې د برید پر مهال یو پوځي او اووه یاغیان وژل شوي دي او دا عملیات لا هم روان دي.