ترکیه کې د چاودنې له امله ۴۰ کسان وژل شوي
د ترکیې د کورنیو چارو وزیر سلیمان سویلو اعلان وکړ چې د دغه هېواد په شمال کې د سکرو په یوه کان کې پرون ماښام د چاودنې له امله لږترلږه ۴۰ کسان وژل شوي.
مخکې د وژل شویو کسانو شمېر ۲۸ ښودل شوی وو.
د رسنیو د معلوماتو له مخې، له چاودنې شاوخوا ۱۵ ساعته وروسته د سرې میاشتې او د ترکیې د طبیعي پېښو پر وړاندې د مبارزې ادارې د ژغورنې ډلې هڅه کوي چې په دغه کان کې بند پاتې ۱۵ کسان وژغوري او په کان کې اور لګېدنه لا هم روانه ده.
د تورې بحیرې په سواحلو کې د بارتین ولایت په اماسرا سیمه کې له دغه کان څخه ۵۸ تنه ژغورل شوي دي.
ټاکل شوې چې د ترکیې ولسمشر رجب طیب اردوغان نن د پېښې ځای ته ولاړ شي.
د چاودنې کره لامل لا هم معلوم نه دی.