اېټالوۍ ستور مزلې کريسټو فوريټي فضا کې له شپږ مياشتو تېرولو وروسته ځمکې ته ستنه شوه
دا وايي، فضا د تګ د فرصت په خاطر منندویه ده.
دې د جرمني په کولن ښار کې د اروپايي ستورمزلو په مرکز کې د یوه خبري کنفرانس په پر مهال وویل، دا هغه څه دي چې دا ورته سترګې په لاره وه.
نوموړې وويل: "او له همدې امله زه د دې فرصت لپاره د زړه له تله منندویه یم. او د دې فرصت لپاره مننه کوم چې په دې ماموریت کې ما د مشرتابه ځینې دندې ترسره کړې. دا زما په فکر د یوه مسلکي کس په توګه د خوښۍ وړ خبره ده."
۴۵ کلنې کریسټو فوریټي وویل، تر ټولو لویه لاسته راوړنه یې دا یقیني کول دي چې ټیم یې د دې تر مشرتابه لاندې په اسانۍ سره کار وکړي.
کریسټو فوریټي لومړنۍ اروپایی ښځه ده چې د ISS مشره او د دې نړیوال فضايي تمځای پنځمه اروپایی قوماندانه وه.
کریسټو فوریټي د شنبې په شپه (د اکتوبر ۱۵) د ISS له اوسني ماموریت ۶۷ له سفره ځمکې ته ستنه شوه.
د ISS د ډېری عملې ماموریت دا و چې د ساینس پر بنسټ ګڼې د ټکنالوژۍ تجربې وکړي.
مهمه برخه یې دا وه چې د انسان په حجرو کې د ځمکې د کشش له کبله رامنځته شوي بدلونونه وڅېړي.
د دوی په تحقیق کې په فضا کې د انسان د بدن د مدافعې پر قوه باندې د خوړو د تغیر اغېز، د معدې روغتیا او تغذیې شاخصونو مستند کول هم شامل وو.
د امریکا د فضايي ادارې ناسا په وینا، فضا ته د دوی د سفر پر مهال دغه ستورمزلې عمله پر ځمکه شاوخوا ۲,۷۲۰ وار - چې په هرو ۹۰ دقیقو کې یو ځل وي – راڅرخېدلې او په فضا کې یې شاوخوا (۱۱۶ ملیون کیلومتره) اوږد سفر کړی دی.