رینا امیري یوځل بیا د افغان ښځو د مهمو حقونو پر تامین ټینګار وکړ
مېرمن امیري نن په څو ټوېټونو کې ویلي چې د ښځو او نجونو په ګډون د ټولو افغانانو ښوونه او روزنه له بېوزلۍ څخه د افغانستان د وتلو او د هیلو د راژوندي کولو لپاره یوه کلیدي مسئله ده.
رینا امیري ویلي، ۴۰۰ ورځې کېږي چې طالبانو نجونې ښوونځي ته له تلو منع کړي دي.
د دې په وینا دوی په زیاتېدونکي ډول د لوړو زده کړو له بهیر څخه نجونې بې برخې کوي، په تېره هزاره نجونې او ښځې په نښه کوي.
رینا امیري وایي، د کره راپورونو له مخې طالبانو د کابل پوهنتون له لیلیې هزاره ښځې ایستلي او د لوړې زده کړو راتلونکې یې له خطرسره مخ کړي او هم داسې راپورونه شته چې ښځې په ازموینه کې د لوړو زده کړو هغو رشتو ته له داخلېدو منع شوي چې هغه د دوی لپاره سختې بلل شوي دي.
د طالبانو د لوړو زده کړو وزارت څه موده مخکې د کابل پوهنتون له لیلیې څخه د یو شمېر نجونو ایستل د لیلیې له ټاکل شویو اصولو سرغړونه بللې ده.