کابل کې د فعالانو د خوشې کېدو غوښتنه؛ بینیټ: نیونې باید د قانون پر اساس وي
د ملګرو ملتونو د بشري حقونو لوی کمېشنر له طالبانو غوښتي دي چې د ښځو د حقونو فعاله ظریفه یعقوبي او د هغې همکاران خوشې کړي.
د بشري حقونو په چارو کې د ملګرو ملتونو لوی کمېشنر وولکر تورک وايي چې طالبانو د پنجشنبې په ورځ په کابل کې د ښځو د یوې مدني ټولنې د خبري غونډې پرمهال پنځه کسان نیولي دي.
ښاغلي وولکر بېګا پر ټویټر په یوه بیان کې د ظریفې یعقوبي نوم نه دی اخیستی، خو په افغانستان کې د ملګرو ملتونو مرستندوی دفتر یا یوناما په یوه جلا بیان کې ویلي چې له طالبانو سره د ظریفې یعقوبي د وضعیت په اړه تماس نیول شوی.
ښاغلي وولکر ویلي، پر افغانستان له واکمنو طالبانو غواړي چې بشري حقونه رعایت کړي او دا یقین ترلاسه کړي چې ټول توقیفونه به د قانون پر بنسټ او د وګړو بشري حقونو ته د درناوي په اساس وي.
یوناما پر ټویټر په خپل بیان کې ویلي دي چې ټول افغانان د ګواښلو او توقیف له وېرې پرته د سوله ایزو غونډو، د بیان او نظر د حق اساسي آزادۍ لري.
د افغانستان د بشري حقونو لپاره د ملګرو ملتونو ځانګړي راپور ورکوونکي ریچارډ بینیټ هم د بشري حقونو د لوی کمېشنر او یوناما له غوښتنې سره خپل غږ غبرګ کړی او پر ټویټر په یوه بیان کې یې د ټولو افغانانو لپاره د غونډو او بیان د آزادۍ د حق غوښتنه کړې او ټینګار یې کړی چې که څوک نیول کېږي، باید د قانون په اساس وي او د نیول شوي کس حقونو ته باید درناوی وشي.
د بشري حقونو یو شمېر فعالان پر طالبانو تور لګوي چې ظریفه یعقوبي او د هغې څلور همکاران یې د پنجشنبې په ورځ په کابل کې په یوه غونډه کې د ښځو د غورځنګ په نوم مدني بنسټ د اعلان پرمهال نیولې دي.
د شوې ادعا له مخې په نیول شویو څلورو کسانو کې خبریالان هم شامل وو.
د ښځو د حقونو فعالې ثریا پیکان په دې اړه آزادۍ راډیو ته وویل: "د طالبانو له خوا د ظریفې یعقوبي او د هغې د همکارانو له نیولو معلومېږي چې د طالبانو حکومت عدالت نه رعایت کوي. دا عمل له بشري حقونو او نړیوالو معیارونو سره مخالف دی."
د ازادي راډیو خبریال هڅه وکړه چې په دې اړه د طالبانو د حکومت نظر هم واخلي، خو له پرله پسې هڅو سره سره ونه توانېد.
طالبان پر افغانستان د واکمنېدو له پیله په دې تورن دي چې د ټولو افغانانو پر بشري حقوقونو په تېره د ښځو پر آزادیو یې محدودیتونه لګولي دي.
له شپږم د لوړو ټولګیو د زده کوونکو نجونو پر تعلیم بندیز، له ډېری ښځو څخه د کار د حق تروړل او د ښځو پر آزادنه تګ راتګ محدودیت هغه مسایل دي چې طالبان یې په نړیواله کچه منزوي کړي او نتیجه یې دا چې نړیوالو د دوی حکومت تراوسه په رسمیت نه دی پېژندلی.