چارواکي: د سالنګ د بندې شوې لویې لارې د خلاصون هڅې روانې دي
د سالنګ لویه لاره د ترافیکو پرمخ بنده شوې ده، خو د خلاصون لپاره یې کار روان دی.
د طالبانو د حکومت د ټولګټو چارو وزارت ویاند عبدالحمیدمصباح بیګا په دې اړه ازادي راډیو ته وویل: "په سالنګونو کې هوا لاهم توپاني ده. هلته د شپې د سالنګونو ساتنې او څارنې د ریاست پرسونل په کار بوخت دی څو څومره ژر چې کولای شي لاره د ترافیک پرمخ خلاصه کړي. هلته تر دوه مترو پورې واوره پرته ده نو د توپاني هوا له کبله یې لاره تړلې ده."
مصباح زیاته کړه چې د کابل- کندهار او غور- هرات په ګډون د هېواد د نورو لویو لارو ستونزې له منځه وړل شوي او خلاصې دي.
افغانستان اوسمهال د تېرو څو لسیزو له ترټولو سخت ژمي سره لاس ګرېوان دی.