داعش د پاکستان په کوټه کې د وروستي ځانمرګي بريد مسووليت ومانه
د رویټرز خبري اژانس په وینا دغه برید د کوټې ختیځ ته په ۱۶۰ کیلو متري سیبي سیمه کې پرون هغه مهال وشو چې په موټر سایکل سپور ځانمرګي بریدګر د پولیسو موټر په نښه کړ.
د 'سایټ' استخباراتي ډلې مشرې ریتا کتز چې د سخت دریځو ډلو انلاین فعالیتونه څاري، پر خپله ټویټرپاڼه لیکلي چې داعش د برید پړه منلې ده.
رویټرز د روغتیایي چارواکو په حواله ویلي چې برید کې ۷ پولیس ټپيان شوي هم دي.
دا په پاکستان کې پر پولیسو د برید تازه پېښه ده.