شویګو: له افغانستانه وسله والو ډلو په منځنۍ اسیا کې خپل فعالیتونه زیات کړي
د روسیې دفاع وزیر وایي، په افغانستان کې دېره وسله والو ډلو د منځنۍ اسیا په هېوادونو کې خپل فعالیتونه زیات کړي دي.
سیرګي شویګو د جمعې په ورځ د هند په پلازمېنې نوي ډیلي کې د شانګهای سازمان د دفاع وزیرانو غونډې ته د خبرو پرمهال دا ادعا وکړه.
نوموړي زیاته کړه چې د داعش، القاعده، د ازبکستان اسلامي تحریک او د ختیځ ترکستان اسلامي تحریک په څېر ډلې ښایي د منځنۍ اسیا په هېوادونو کې نفوذ وکړي.
روسیې مخکې هم ورته اندېښنې څرګندې کړې وې.
طالبان بیا وایي چې دوی د دوحې د تړون له مخې دې ته ژمن دي چې هیچا ته به اجازه ورنه کړي چې د افغانستان خاوره د نورو هېوادونو پر ضد وکاروي.