د اوکراين ولسمشر هالنډ ته ځي
د هالنډ حکومت وایي، د اوکراین ولسمشر ولودمیر زیلنسکي به نن له دې هېواد څخه کتنه ترسره کړي.
د هالنډ د بهرنیو چارو وزارت ویلي، تمه ده چې زیلنسکي به په دې سفر کې له چارواکو سره په لیدنو کتنو سربېره، د اوکراین لپاره له عدالت پرته سوله نهشته، تر عنوان لاندې یوه وینا هم وکړي.
دا به د ۲۰۲۲م کال په فبرورۍ میاشت کې پر اوکراین د روسیې له یرغل راهیسې هالنډ ته د زیلنسکي، له مخکې نااعلان شوی، لومړی سفر وي.
د اوکراین ولسمشر له دغه یرغل راهیسې یو شمېر هېوادونو ته سفرونه کړي دي.
نوموړي پرون چهارشنبې د فنلنډ له پلازمېنې هیلسنکي څخه کتنه ترسره کړه.