کرکټ؛ د سریلانکا لوبډلې افغانستان ته د ۲۶۹ منډو هدف وټاکه
د سریلانکا کرکټ ملي لوبډلې په لومړۍ یو ورځنۍ سیالۍ کې د افغان لوبډلې پر وړاندې ۲۶۸ منډې جوړې کړې.
دغه سيالي چې نن د کابل پر وخت سهار ۹:۰۰ بجې پیل شوې ده، افغان لوبډلې پچه وګټله او سریلانکا ته یې د توپوهنې بلنه ورکړه.
کوربه لوبډلې د ټولو لوبغاړو په سوځېدو په ټاکلو ۵۰ اورونو کې ۲۶۸ منډې جوړې کړې.
سریلانکا ته چاریت اسلانکا او دننجایا دیسلوا په ترتیب سره ۹۱ او ۵۱ منډې وکړې.
په افغان توپ اچونکو کې بیا فریداحمد او فضل حق فاروقي ۲ـ۲، عظمت الله عمرزي، مجیب الرحمن، نوراحمد او محمدنبي یوه ـ یوه ویکټ ترلاسه کړه.
د افغان لوبډلې د توپوهونکو په ترکیب کې نن رحمن الله ګربز، ابراهیم ځدراڼ، رحمت شاه، حشمت الله شهیدي، نجیب الله ځدراڼ، محمدنبي او عظمت الله عمرزي ته چانس ورکړل شوی دی.
د ویلو ده چې راشدخان به په لومړنیو دوه سیالیو کې نه لوبېږي.