هند څلور کسان په افغانستان کې له داعش سره د یوځای کېدو په تور نیولي
د هند د ګجرات ایالت د تروریزم ضد ډلې پرون شنبه ویلي، چې په نیول شویو کې درې نارینه د کشمیر د سرینګر اوسېدونکي دي او نیول شوې ښځه د ګجرات د سورات ښار اوسېدونکې ده.
د هند رسنۍ وايي، دغو څلور واړه کسانو غوښتل د ایران له لارې افغانستان ته تر اوښتو وروسته د داعش ډلې د خراسان ولایت له څانګې سره ملګري شي.
د پولیسو یوه چارواکي دیپان بهادران ویلي، پر دغو کسانو د نورو تورونو تر څنګ له یوې ممنوعه سازمان سره د ملګري کېدو او ملاتړ تور هم لګېدلی دی.
د طالبانو عمده مخالفې ډلې داعش، په افغانستان کې د ځینو وروستیو خونړیو حملو مسوولیت منلی دی.