د اسلامي همکاریو سازمان او جاپان په افغانستان کې پر مرستو او پروژو خبرې کړي
د افغانستان لپاره د اسلامي همکاریو د سازمان د سرمنشي ځانګړي استازي طارق علي بخیت او د دې سازمان د بشري مرستو د وجهي صندوق مسوول جمال الساعاتي د جاپان د حکومت له چارواکو او د دغه هېواد د هغو موسسو له مشرانو سره چې په افغانستان کې فعالیت کوي له دوشنبې تر جمعې پورې په جاپان کې غونډې لرلې.
په هغه بیان کې چې د اسلامي همکاریو سازمان پرون خپور کړ پهکې راغلې چې دواړو لوریو موافقه وکړه چې په افغانستان کې د ګډو پراختیایي پروژو د چارو د عملي کېدو لپاره یوه لاره پيدا شي.
د بیان له مخې د دې غونډو په ترڅ کې پر دې هم خبرې وشوې چې څرنګه ممکنه ده چې د اسلامي همکاریو د سازمان، جاپان او ملګرو ملتونو ترمنځ له افغانستان سره مشترکې همکارۍ ته زمینه برابره شي.