له بې کیفیته درملو د افغانانو شکایت؛ ايمل: مور مې په اتو نسخو درملو ښه نه شوه
د کابل ښار د قرغې سیمې اوسېدونکې ادیبې ازادي راډیو ته وویل: "لمسی مې ناروغ و، د خولې او لمنې و، ډاکټر ته مو وروست، دوا مو واخیسته، خو هېڅ ګټه یې ونه کړه. سبا بیخي بدتر شو، بیا مو ور ويست، چې وه ډاکټر صيب دا دوا خو سمه نه وه، سمه دوا ورکړئ، دا له خبرو پاتې دی، دوا مو ډاکټر ته ور وښوده، ډاکټر وویل چې د دوا کیفیت سم نه دی، لمسی مې ډېر بدتر شو او په شفاخانه کې بستر شو."
ادیبه وايي، مخکې هم د بې کیفیته درملو له امله ورته ستونزو سره مخ شوې ده.
د لغمان ولایت اوسېدونکی ايمل هم ورته خبره کوي.
هغه وايي، ډېر خلک د بې کیفیته درملو له امله، د ښې درملنې لپاره ګاونډیو هېوادونو ته ځي.
ایمل زیاته کړه: "یو ځل مې مور ناروغه شوې وه، ۸ نسخې دوا مو ورته واخیسته، خو ښه نه شوه. په افغانستان کې کومه خارجي دوا چې راځي بې کیفیته وي. اساسي ستونزه په درملو کې ده."
د درملو یو شمېر پلورونکي هم تايیدوي، چې د درملو کیفیت ټیت دی.
په کابل ښار کې د درملو یو پلورونکی چې د موضوع د حساسیت له امله نه غواړي نوم یې په راپور کې واخیستل شي، ادعا کوي چې په افغانستان کې ۸۰ سلنه درمل بې کیفیته دي.
نوموړی وايي: "له بده مرغه چې په افغانستان کې د درملو کیفیت ډېر ټیټ دی، لامل یې دا دی چې افغانستان ته دوا قاچاق راځي. هغه درمل راځي چې تاریخ یې کم پاتې وي، هغه درمل راځي چې لوکل وي او دلته د درملو مصئونیت او موثریت نهشته."
د بې کیفیته درملو د پلور پر وړاندې مو د طالبانو د اقداماتو په اړه د عامې روغتیا وزارت لپاره د دوی ویاند شرافت زمان او د خوړو او درملو ملي ادارې لپاره یې ویاند وپوښتل، خو دوی د راپور تر خپرېدو زموږ پوښتنې ځواب نهکړې.
مخکې د هوخست په نوم د درملو جوړولو یوې دولتي فابریکې په افغانستان کې فعالیت درلود، خو اوس معلومه نهده، چې دا فابریکه فعالیت لري او کنه.
تازه، په کندهار ولایت کې د سنو فارما په نوم د درملو د تولید یوې فابریکې په کار پیل کړی.
د دغې فابریکې مسول محمد طاهر صدیق وايي، د درملو د تولید او توزیع کار یې له تېرې اونۍ راهیسې پيل کړی او د ښو درملو تولید ته ژمن دي.