په چین کې د سېلابونو له امله ۱۱ کسان مړه شوي او ۲۷ نور لادرکه دي
د چین دولتي رسنۍ وايي، د پلازمېنې پېکېنګ په شاوخوا غرونو کې د سېلابونو له امله ۱۱ کسان مړه شوي او ۲۷ نور لادرکه دي.
د چین د دولتي نشراتي شبکې 'سي سي ټي وي' د راپور له مخې د څو ورځو سختو بارانونو، چارواکي اړ کړي چې د اورګاډي تمځایونه وتړي او په زیان منونکو سیمو کې خلک د ښوونځیو جیمنازیومونو کې ځای پرځای کړي.
د راپور له مخې د سېلابونو اوبه کورونو ته ننوتي او موټر په ډنډونو کې ډوب شوي.
د پېکېنګ لپاره چې معمولاً یې هوا معتدله او وچه ده، د ورښت وروستی کچه ډېره غير معمولي ده.
د چین په شمالي نورو برخو کې هم د زیاتو ورښتونو له امله چې بې ساري بلل شوي، راوتلو سېلابونو لسګونو کسانو ته مرګژوبله اړولې ده.