اسلام اباد کې لاریون؛ افغان معترضان: طالب یوه استبدادي ډله ده، نړیوال دې تعامل نه ورسره کوي
په دې لاريون کې چې په لسګونو افغان نارينه او ښځو په کې ګډون کړى و په تېرو دوه کلونو کې د طالبانو پر کړنو سختې نيوکې وشوې.
د دغه لاريون یوې تنظيموونکې مونسې مبارز وويل، لاريون کوونکو د افغانانو د يووالي، پيوستون او د طالبانو پر وړاندې د ملي پاڅون پر غوښتنې ټینګار وکړ.
نوموړې وویل:" لاريون کوونکو نړۍ ته څرګند او مشخص پيغامونه درلودل او د نړۍ او طالبانو تر منځ د معاملې په اړه يې خپله ناخوښي څرګنده کړه. طالبان او د افغانستان په جغرافیه کې د طالبانو شتون او د طالبانو له ظلم او استبداد څخه شکایت وکړ. "
لاریون کوونکو په یو لس ماده ییز پریکړه لیک کې په ښکاره توګه د طالبانو په وړاندې د افغانستان او نړۍ خلکو ته خپلې غوښتنې وړاندې کړې.
دغه راز په دغه پرېکړه ليک کې لاريون کوونکو له ملګرو ملتونو، نړيوالې ټولنې او د بشري حقونو له بنسټونو غوښتي چې طالبان په رسميت ونه پېژني او د دوى په وينا، طالبانو ته د ميليونونو ډالرو مرستې دې ورباندې ودروي.
تر اوسه هېڅ هېواد د طالبانو حکومت په رسمیت نه دی پېژندلی او امریکايي چارواکو هم تل پر دې ټینګار کړی چې د افغانانو د بشري مرستو لپاره د امریکا متحده ایالاتو او نړیوالې ټولنې مرستې د طالبانو لاس ته نه ورځي.
د طالبانو د حکومت د ویاند مرستیال بلال کریمي له خلکو سره د دوی د چلند او د اعتراض کوونکو د نیوکو په اړه د ازادي راډیو پوښتنو ته ځواب ونه وایه.
د ۲۰۲۱ کال د اګسټ په ۱۵ د طالبانو له دویم ځل واکنمۍ وروسته ډیری افغانانو د مختلفو دلایلو له مخې هیواد پریښود او بیلابیلو هیوادونو ته کډوال شول.
فقر، بیکاري او د بهرنیو بنسټونو سره د ډیرو افغان کورنیو د کډوالۍ دوسیې په تیرو دو کلنو کې یو بل مهم عامل د کډوالۍ و چې زیات شمېر افغانان یې ګاونډیو هېوادونو لکه پاکستان او ایران ته د کډوالۍ لپاره اړ کړه.
باید وویل شي چې د پاکستان په پلازمېنه اسلام اباد کې د افغان کډوالو تر څنګ د جرمني او کاناډا په ګډون په یو شمېر نورو هېوادونو کې هم ځینې افغان کډوالو اعتراضونه کړي او د طالبانو پر حکومتولۍ او له خلکو سره یې ددوی د چلند په اړه پر دوی سختې نیوکې کړې دي.