هیدر بار: بهرني ډیپلوماتان د افغان مېرمنو غږ نه اوري
د بشري حقونو د څار سازمان د ښځو د برخې مرستیالې پر بهرنیو ډیپلوماتانو نیوکه کړې چې د افغان مېرمنو غږ نه اوري.
هیدر بار دا خبره په کابل کې د طالبانو له خوا د شپږو افغان ښځينه فعالانه د موقتي بندیانېدو په غبرګون کړې ده.
مېرمن بار ویلي، ډیپلوماتان د هغو فعالانو غږ چې له بهر یې پورته کوي په بېلابېلو پلمو نه اوري.
اخوا د افغانستان د پخواني پارلمان یوې غړې مریم سلیمانخېل هم نیوکه کړې چې د هغې په خبره په بهر کې د طالبانو خواخوږي د افغان ښځينه فعالانو غږ نه اوري او په افغانستان کې دننه هم خاموشه یا له طالبانو په وېره کې دي.
اغلې مریم سلیمانخېل ویلي، هر ځای چې وي هره مېرمنه باید د افغان ښځو په ملاتړ غږ پورته کړي.
د راپورونو له مخې د طالبانو ځواکونو چې اټکل کېږي د دوی د استخباراتو کارکوونکي به وو د کابل له خیرخانې سیمې لږ تر لږه شپږ ښځينه فعالانې د یکشنبې په شپه ونیولې.
دا ښځینه فعالانې د راپورونو له مخې له څو ساعته زندان وروسته په دې شرط خوشې شوي چې بیا به د اعتراض نه کوي او غونډې به نه جوړوي.