زیلینسکي د اوکراین ختیځ او جنوب ته نوي وسایل او وسلې استوي
ولسمشر ولودیمیر زیلینسکي د اوکراین په ختیځ او جنوب کې له قوماندانانو او سرتېرو سره د کتنې لپاره د دوو ورځو تر تېرولو وروسته بېګا پلازمېنې کییف ته راستون شو.
زیلینسکي وايي، د دې سفر هدف دا و، چې د سرتېرو غوښتنې واوري او د حل لپاره یې جنرالانو او چارواکو ته ورسوي.
زیلینسکي بېګا پر خپله ایکس پاڼه په یوه ویډیويي پیغام کې وویل، په دې ترڅ کې یې له دیارلسو محاربوي قطعو څخه لیدنه وکړه.
هغه زیاته کړه چې پوځیانو ته به نوي وسایل او وسلې واستول شي.
له بلې خوا د اوکراین د وسله والو ځواکونو ستر درستیز په خپل ورځني راپور کې ویلي دي چې د پرونۍ ورځې په ترڅ کې له روسي ځواکونو سره په شلو ځایونو کې نښتې شوې چې ټولې په شا تمبول شوي.