غزه کې د اسراییلو د دویم پړاو جګړې اعلان؛ نوې پېښې او غبرګونونه
د اسوشېټېډ پریس خبري اژانس د راپور له مخې، دغه روغتون له هغو ناروغانو او هغو لسګونو زره فلسطینیانو ډک و، چې هلته یې پناه اخیستې وه.
اسراییل ویلي، چې تر روغتون لاندې د حماس ډلې د قوماندې مرکز و، خو په دې باب یې نور جزییات نه دي ورکړي.
دا حملې یوه ورځ وروسته له هغې کېږي، چې د اسراییل صدراعظم بنیامین نتنیاهو د حماس ډلې پر خلاف د جګړې دویم پړاو اعلان کړ.
اسراییل نن یکشنبه هم په غزه کې خپلې حملې سختې کړي او له ملکیانو یې غوښتنه کړې، چې جنوبي ساحو ته ځانونه ورسوي.
د روانې وژونکې جګړې د ختمېدو لپاره د اوربند له غوښتنو سره- سره د جګړې شدت کم شوی نه دی او د ملګرو ملتونو سرمنشي انتونیو ګوتیریش نن یکشنبه خبرداری ورکړ، چې د حماس تر ولکې لاندې د غزې وضعیت په چټکۍ د خرابېدو خوا ته روان دی.
ګوتیریش د نیپال پلازمېنې کټمنډو ته د سفر پر مهال ویلي، تر دې شېبې په غزه کې وضعیت د خرابۍ خوا ته روان دی.
د ملګرو ملتونو سرمنشي ویلي اسراییل په بشري لحاظ په جګړه کې د وقفې راوستلو پر ځای، چې نړیواله ټولنه یې ملاتړ کوي، خپل پوځي عملیات لا شدید کړي دي.
په همدې اړه د ایران ولسمشر ابراهیم رئیسي هم نن په خپله اېکس شبکه یا پخواني ټویټر کې لیکلي، د اسراییل جنایتونه له سرو کرښو اوښتي او دا کار «ټول کسان» اقدام ته هڅوي.
هغه لیکلي، چې واشنګټن له خلکو غواړي چې اقدام ونه کړي، حال دا چې خپله د اسراییل پراخ ملاتړ کوي.
بلخوا: د سره صلیب نړیوالې کمېټې په غزه کې د نه زغمل کېدونکي کړاو په باب خبرداری ورکړی دی.
په داسې حال کې اسراییل ویلي چې جګړه دویم پړاو ته داخله شوې ملګرو ملتونو ویلي، ممکن په زرګونو نور ملکیان هم ووژل شي.
وروسته له هغې چې حماس ډلې د اکتوبر پر اوومه پر اسراییل حمله وکړه او ۱۴۰۰ کسان چې ډېری یې ملکیان وو، ووژل او ۲۳۰ نور کسان یې یرغمل کړل، اسرائیل د غزې سخته بمباري پیل کړه.
د فرانسې خبري اژانس د حماس تر ولکې لاندې د روغتیا وزارت په حواله خبر ورکړی، له هغې راهیسې چې پر غزه د اسراییل حملې پیل شوي، تر ۸۰۰۰ زیات کسان وژل شوي، چې نیمايي یې ماشومان دي.
د سره صلیب نړیوالې کمېټې مشرې میریانا سپولیاریک د جګړې له ټولو لوریو سم د لاسه د شخړې کمولو غوښتنه کړې ده.