طالبان د کابل موټر چلوونکو ته؛ موسیقي مه اورئ، زموږ اوامر عملي کړئ
د طالبانو د امر بالمعروف او نهی عن المنکر وزارت محتسبینو په کابل کې د ګرځېدونکو موټرو له چلوونکو غوښتي، چې د موسیقۍ له اورېدو ډډه وکړي.
دغه وزارت نن په یوه اعلامیه کې ویلي، دغو محتسبینو د طالبانو د عمومي مشر ملا هبت اله اخندزاده د سپارښتنو پلي کولو لپاره چک پاینټونه جوړ کړي او د دغو چک پاینټونو پر مهال یې له چلوونکو وغوښتل چې د موسیقۍ له غږولو ډډه وکړي.
له چلوونکو غوښتل شوي داسې کړنې دې هم نه کوي، چې د امربالمعروف وزارت له پالیسۍ سره په ټکر کې وي.
چلوونکو ته امر شوی، چې بې حجابه او بې محرمه ښځې دې هم خپل موټر ته نه خېژوي.
پر افغانستان د طالبانو د ولکې له بیا ټینګولو وروسته د طالبانو امر بالمعروف وزارت پر خلکو زیات محدودیتونه لګولي، چې دې کار د ډېرو څارونکو په باور، د خلکو فردي ازادۍ هم محدودې کړې دي.