د ایران او اسراییل تازه بریدونه، اسراییل کې ۸ تنه وژل شوي
پر اسراییلو د ایران نننیو بریدونو کې د لږ تر لږه ۸ کسانو د وژل کېدو راپور ورکړل شوی دی.
نړیوالو اژانسونو د اسراییل د بیړنیو خدمتونو د ادارې په حواله ویلي چې وژل شویو کې ماشومان هم شامل دي.
دغو توغندیزو بریدونو کې لسګونه تنه ټپیان شوي دي.
د ایران له بریدونو سره همهاله د اسراییل میلیونونه کسانو د خطر زنګ واورېد او خوندي ځایونو کې پټ شول.
ایران دغه بریدونه وروسته تر هغه وکړل چې اسراییل نن سهار وختي د ایران د دفاع وزارت پر ودانۍ او د تېلو پر یوشمېر زیرمو بریدونه وکړل.
ایراني چارواکو د دفاع وزارت پر ودانۍ او یوشمېر نورو ځایونو د اسراییل بریدونه تایید کړي، خو د مرګ ژوبلې جزیات یې نه دي ورکړل.
مخکیني معلومات:
د اسراییل پوځ وایي، نن یکشنبه د ( غبرګولي ۲۵مه) یې په ایران کې " ګڼ شمېر" هدفونه په نښه کړي دي. په دغو هدفونو کې د دفاع وزارت ودانۍ او د ایران د اټومي وسلو اړوند هدفونه شامل دي.
له دې سره همهاله د ایران تسنیم خبري اژانس د یکشنبې په سهار راپور ورکړی چې د ایران د دفاع وزارت ودانۍ او د دغه وزارت د څیړنو او دفاعي نوښتونو څانګه د تهران په شمال کې تر برید لاندې راغلي.
د تسنیم د ادعا له مخې، دغه برید کې یوازې د دفاع وزارت یوه اداري ودانۍ سرسري زیانمنه شوې ده.
خو د اسراییل پوځ ویلي، د ایران د دفاع وزارت د څیړنو او دفاعي نوښتونو څانګه یې د دې لپاره په نښه کړې چې د ادعا له مخې يې " اټومي وسلو ته د ایران د رسېدو چارې په کې مخته تلې او داسې ځای و چې ایران خپل اټومي ارشیف هلته پټ کړی و".
په ایران باندې د اسراییلو په نننیو بریدونو کې د مرګ ژوبلې راپور نه دی ورکړل شوی.
بل لورته ایران هم د یکشنبې په سهار په اسراییلو باندې د توغندیو تازه بریدونه بیا پیل کړل.
د اسراییلو پوځ د یکشنبې په سهار وختي راپور ورکړ چې دوی له ایران څخه د توغندیو نوې څپه کشف کړې او له خلکو یې وغوښتل چې پناه واخلي.
اسوشیټیډ پریس د اسراییلو د بیړنیو چارو د چارواکو په حواله راپور ورکړ چې په بریدونو کې په یوه استوګنیزه ودانۍ کې څلور کسان وژل شوي دي.
په اسراییلو باندې د ایران د بریدونو له نوې څپې وروسته، سپاه پاسدران انقلاب ګواښ وکړ چې که اسراییل خپل بریدونو ته دوام ورکړي نو تهران به "په پراخه کچه" ځواب ووایی.
د اسراییل او ایران ترمنځ جګړه داسې مهال پيل شوې چې له تېرو څو اونیو راهیسې د امریکا او ایران مرکچیانو یوه اټومي تړون ته د رسیدو هڅه کوله.
ایران اوس د اټومي خبرو دوام " نه توجیه کېدونکی کار" بللی دی.
اسوشیټیډ پریس راپور ورکړ چې د ایران د بهرنیو چارو وزیر عباس عراقچي د شنبې په ورځ د اروپایي ټولنې له لوړ پوړي ډیپلوماتې کایا کلاش سره په تلیفوني اړیکه کې وویل چې د اسراییلو له بریدونو وروسته اټومي خبرې اترې "نه توجیه کیدونکي" دي.
په یوه بیان کې چې دولتي ایرنا خبري اژانس لخوا خپور شوی، عراقچي وویل چې د هغه په هیواد باندې د اسراییلو بریدونه، د هغه په نظر، د واشنګټن د ملاتړ مستقیمه پایله ده.
د امریکا ولسمشر ډونالډ ټرمپ د جمعې په ورځ له ایران څخه وغوښتل چې د خپل اټومي پروګرام په اړه له واشنګټن سره یوې موافقې ته ورسیږي.
د ولسمشر ټرمپ د ادارې د دوهمې دورې له پیل راهیسې، متحده ایالاتو او ایران د نوي اټومي تړون لپاره پنځه پړاوه خبرې اترې کړې دي، خو پرته له کومې پایلې څخه.