په سوات کې په ټرافيکي پېښه کې د يوې کورنۍ ۱۵ کسان وژل شوي دي
چارواکي وايي چې په سوات کې په ټرافيکي پېښه کې د یوې کورنۍ ۱۵ کسان وژل شوي او ۷ نور ژوبل دي.د ملاکنډ د ژغورنې ادارې ریسکیو ۱۱۲۲ ویاند صادق شاه مشال رېډیو ته ويلي چې د اکتوبر پر ۱۵مه شپې مهال له بحرینه روان شوی د بنجاریانو يو ټرک د ملاکنډ موټروې له درېيم ټونل سره نېزدې ژورې کندې ته پرېوتی دی. د ده په خبره، په ټرک کې د يوې کورنۍ ۲۳ کسان سپاره ول.
د ده په وینا، په پېښه کې ۱۴ کسان په هغه ځای مړه شوي دي او ۸ نور زخمیان دي چې پکې د څلورو حالت مرګونی دی. په مړو کې پینځه ماشومان او څلور ښځې دي.
۷ زخمیان د بټ خيلې روغتون ته وړل شوي ول. يو ټپی د سيدو شرېف هسپتال ته رسول شوی وو چې هغه هلته د ټپونو له کبله ساه ورکړې ده.
د سوات ترڅنګ د پاکستان په نورو برخو کې هم وخت په وخت ټرافیکي پېښې زياتره وخت د ټرافیکي قوانینو د نه عملي کېدو، د سړکونو د خرابوالي، د ډرېورانو د بې احتیاطۍ او د هغوی د سمې روزنې نه کېدو او پر ټاکلي وخت د ګاډو د مرمت او معاینې نه کولو له وجې کېږي.
د دې ترڅنګ په ځینو وړو ښارونو او کلیوالو سیمو کې د ټرافیک کنټرول نظام کمزوری دی چې د حادثو مخه نیول ګرانوي. داراز، په ګاډو کې له اندازې زیات بار لېږدول یې هم کله نا کله توازن خرابوي او د پېښو ښکار کېږي.
له همدې وجې د پاکستان په مختلفو برخو کې ټرافیکي پېښې وخت په وخت خلکو ته ځاني او مالي تاوانونه اړوي.