Turqia ndalon gruan e ish-liderit të IS-it, Abu Bakr al-Baghdadi
Të martën Turqia ka thënë se ka ndaluar edhe motrën e Baghdadit në Siri, Rasmiya Awad.
“Shtetet e Bashkuara kanë thënë se Baghdadi ka vrarë veten në tunel. Ata kanë nisur këtë fushatë të komunikimit”, ka thënë Erdogan, duke iu referuar detajeve të bastitjes, të bëra publike nga zyrtarët amerikanë.
“Mirëpo unë po e bëj publike këtu për herë të parë: ne kemi zënë gruan e tij dhe nuk e kemi diskutuar këtë gjë sikurse ata. Ngjashëm ne kemi zënë edhe motrën dhe dhëndrrin e tij në Siri”, ka thënë mes tjerash Erdogan.
Ish-lideri i IS-it ka kryer vetëvrasje gjatë një bastisjeje të forcave speciale amerikane në vendbanimin e tij në veriperëndim të Sirisë muajin e kaluar.
Vdekja e tij është konsideruar fitore për presidentin amerikan, Donald Trump, mirëpo kritikët argumentojnë se IS-i vazhdon të përbëjë kërcënim për sigurinë në Siri dhe vende tjera.
Javën e kaluar, grupi ekstremist, Shteti Islamik ka konfirmuar vdekjen e Baghdadit dhe ka emëruar, Abu Ibrahim al-Hashemi al-Qurashi, si lider të ri.
Presidenti amerikan, Donald Trump ka njoftuar për vdekjen e Baghdadit në një konferencë për media më 27 tetor.
Pas operacionit të forcave amerikane, baza e tij është shkatërruar me sulme ajrore.
Al-Baghdadi ka qenë një nga terroristët më të kërkuar në botë.
Në kulmin e fuqisë më 2014 dhe 2015, grupi Shteti Islamik ka kontrolluar një sipërfaqe prej 88,000 kilometrash katrorë që shtrihej nga Siria perëndimore në Irakun lindor.