Ulet ndjeshëm numri i rasteve të reja me COVID-19 në Shqipëri
Nga sëmundja COVID-19 që e shkakton koronavirusi i ri janë shëruar 654 pacientë, ka thënë Eugena Tomini nga Instituti i Shëndetit Publik.
"Për më shumë se dhjetë ditë nuk kemi asnjë humbje jete", ka thënë ajo.
Më 11 maj Shqipëria ka lehtësuar edhe disa masa të izolimit, por autoritetet u kanë bërë thirrje qytetarëve të tregojnë kujdes të shtuar.
"Pavarësisht lehtësimit të masave, Ministria e Shëndetësisë dhe Mbrojtjes Sociale i fton qytetarët të respektojnë rregullat, të ruajnë distancimin fizik dhe higjienën personale; bizneset të zbatojnë protokollet e sigurisë për të ruajtur shëndetin e qytetarëve. Qytetarët duhet të jenë të kujdesshëm të mos neglizhojnë shenjat e sëmundjes Covid-19", ka thënë Tomini.