Maqedoni e V.: Doza e tretë e vaksinave për të gjitha moshat
“Komiteti rekomandon që doza e tretë e vaksinës mund të merret nga të gjitha moshat, jo vetëm ata mbi moshën 60 vjeç. Ky rekomandim bazohet në rekomandimet e shteteve tjera evropiane dhe SHBA-së”, ka deklaruar Filipçe duke iu bërë thirrje qytetarët që të vaksinohet, pasi imunizimi i popullatës mbetet mënyra e vetme për përballje me pandeminë.
Doza e tretë do të merret vetëm me vaksinën Pfizer, pa marrë parasysh se me cilin lloj të vaksinës janë marrë dy dozat e para.
Për të marrë dozën e tretë, qytetarët duhet të kenë kaluar një periudhë prej gjashtë muajve nga marrja e dozës së dytë.
Deri më 2 tetor, sipas Ministrisë së Shëndetësisë, gjithsej 734,023 janë vaksinuar me nga dy doza ndërsa dozën e tretë e kanë marrë vetëm 329 persona.
Ministri i Shëndetësisë, ndërkohë ka njoftuar edhe për testimin e 8,200 nxënësve në shkolla me teste të shpejta për të parë nëse në mesin e tyre ka raste asimptomatike të virusit korona si dhe nëse ka përhapje të virusit brenda shkollave.
Në Maqedoninë e Veriut deri më tani me koronavirus janë diagnostikuar afër 190 mijë persona, prej tyre 6.704 e kanë humbur jetën ndërsa rreth 12 mijë ende janë raste aktive.