Evropa përfshihet nga protestat kundër izolimit
Në mbrëmjen e 20 nëntorit trazirat e reja kanë shpërthyer në Holandë kundër rregullave të reja të bllokimit.
Protestuesit hodhën fishekzjarre ndaj policisë dhe u vunë flakën biçikletave në Hagë, një natë pasi protestat në Roterdam u bënë të dhunshme dhe policia hapi zjarr. Gjatë përleshjeve disa persona ishin plagosur. Kryebashkiaku i qytetit i quajti protestat "një orgji dhune". Holanda vendosi një bllokim të pjesshëm tre-javor të shtunën e kaluar pasi regjistroi një rritje rekord të rasteve me koronavirus.
Baret dhe restorantet duhet të mbyllen në orën 20:00 dhe ngjarjet sportive janë të ndaluara.
Mijëra demonstrues dolën gjithashtu në rrugët e Austrisë, Kroacisë dhe Italisë.
Sipas vlerësimeve jozyrtare, rreth 15,000 njerëz u mblodhën në sheshin kryesor të Zagrebit të shtunën pasdite për të protestuar kundër masave ndaj pandemisë të Qeverisë kroate, përfshirë vaksinimin e detyrueshëm për punëtorët e sektorit publik.
Gjatë protestës një gazetar është sulmuar fizikisht dhe shumë të tjerë janë sulmuar verbalisht.
Asnjë nga protestuesit nuk ka mbajtur maskë dhe as nuk ka respektuar distancën fizike.
Protesta është iniciuar përmes rrjeteve sociale nga organizata joqeveritare “Nisma për të Drejtat dhe Liritë”. Në mesin e atyre që u mblodhën në protestë ishin edhe disa deputetë të opozitës.
Dhjetëra mijëra njerëz protestuan në kryeqytetin e Austrisë, Vjenë, pasi qeveria njoftoi një bllokim të ri kombëtar dhe planet për t'i bërë të detyrueshme vaksinimet nga muaji shkurt i vitit 2022. Ky është vendi i parë evropian që e bën vaksinimin një detyrim ligjor.
Vendi do të hyjë në një bllokim mbarëkombëtar 20-ditor nga e hëna (22 nëntor), duke mbyllur të gjitha dyqanet përveç atyre thelbësore dhe duke urdhëruar njerëzit të punojnë nga shtëpia.
Ndërsa në Itali, disa mijëra protestues u mblodhën në Romë për të kundërshtuar certifikatat e vaksinimit që kërkohen në vendet e punës dhe transportin publik.
Të shtunën (20 nëntor) Organizata Botërore e Shëndetësisë (OBSH) tha se ishte "shumë e shqetësuar" për rritjen e rasteve të reja të të infektuarve me koronavirus në kontinent.
Drejtori rajonal i OBSH-së, Hans Kluge, i tha BBC-së se nëse masat nuk forcohen në të gjithë Evropën, gjysmë milioni vdekje mund të regjistrohen deri në pranverën e ardhshme.
"COVID-19 është bërë edhe një herë shkaku numër një i vdekshmërisë në rajonin tonë", tha ai.