PDK kërkon që Qeveria të reagojë për deklaratat e Vullinit
Javën e kaluar, Vullin deklaroi se masakra e Reçakut ishte “gënjeshtër e madhe dhe fabrikim i jashtëzakonshëm”.
“Alleksandar Vullin tha që Reçaku është ngjarje fiktive. Jo që nuk pritet nga ai një gjë e tillë, por është e çuditshme që nuk pati reagim nga kjo Qeveri. Reagoi SHBA-ja, reagoi Bashkimi Evropian. Çfarë reagimesh pati nga Kosova në raport me këtë deklaratë? Është e turpshme që ne të dalim me një reagim kaq të dobët, nuk po flas si Qeveri, po si Kosovë dhe shoqëri…”, tha deputeti i PDK-së, Adrian Kastrati gjatë seancës të Kuvendit të Kosovës, që po mbahet të hënën.
Kryeministri i Kosovës, Albin Kurti, që ishte i pranishëm në seancën plenare, nuk u përgjigj ndaj kësaj deklarate të deputetit Kastrati. Kabineti i tij nuk i është përgjigjur as pyetjeve lidhur me këtë çështje që Radio Evropa e Lirë i ka dërguar të premten, më 10 dhjetor.
Ndërkaq, kreu i Kuvendit, Glauk Konjufca tha se shteti i Kosovës reagon përmes proceseve gjyqësore ndaj njerëzve që mohojnë masakra të tilla.
“Mos ia degradoni dinjitetin vuajtjeve dhe sakrificës popullit të Kosovës”, tha Konjufca.
Shtetet e Bashkuara dhe Bashkimi Evropian kritikuan Vullin për deklaratat lidhur me masakrën e Reçakut, e cila, sipas Uashingtonit dhe Brukselit është një ngjarje e dokumentuar mirë.
Më 15 janar të vitit 1999, forcat policore dhe ushtarake serbe në Kosovë vranë 45 civilë shqiptarë në fshatin Reçak në Komunën e Shtimes.
Krimet e kryera në këtë fshat i kishte dokumentuar kreu i atëhershëm i misionit vëzhgues të Organizatës për Siguri dhe Bashkëpunim në Evropë, William Walker.
Ngjarja e Reçakut u pasua nga bombardimet e NATO-s mbi caqet serbe në Kosovë si dhe në Serbi.
Vullin ka mohuar disa herë në të kaluarën masakrën e Reçakut, duke e quajtur këtë masakër si një “krim të fabrikuar”.