Kosova i kërkon Serbisë t’i largojë trupat ushtarake nga kufiri me të
Qeveria e Kosovës i bëri thirrje të shtunën vonë shtetit fqinj Serbisë t’i tërheqë trupat ushtarake nga vija kufitare me të.
“Qeveria e Republikës së Kosovës me vëmendje dhe vigjilencë është duke ndjekur zhvillimet e fundit sa i përket lëvizjes së njësive ushtarake të Forcave të Armatosura të Serbisë në drejtim të vijës kufitare me Republikën e Kosovës”, tha Qeveria e Kosovës në një komunikatë për media.
Zhvendosja trupave serbe përgjatë kufirit me Kosovën vjen rreth një javë pas sulmit të 24 shtatorit ndaj Policisë së Kosovës në Banjskë të Zveçanit, ku mbeti i vrarë rreshteri Afrim Bunjaku.
Sipas saj, ushtria serbë ka lëvizur në tri drejtime në kufirin me Kosovën, në drejtimin e kufirit verior, verilindor dhe lindor.
Ushtria serbe vendosi të premten, sipas Qeverisë së Kosovës, “kapacitetet e tyre ushtarake dhe të xhandarmërisë nëpër 48 bazat e përparme operacionale, që janë të shtrira përgjatë vijës kufitare me Republikën e Kosovës, pak kilometra në thellësi të territorit të Serbisë.”
Në këtë vendosje përfshihen edhe vendosja e sistemeve kundër-ajrore dhe artilerisë së rëndë, sipas saj.
Qeveria tha se ka mbajtur kontakte të vazhdueshme me Shtetet e Bashkuara dhe vendet e Bashkimit Evropian në lidhje me, siç e ka quajtur, këtë kërcënim serioz nga Serbia.
Të premten, Shtetet e Bashkuara i bënë thirrje Serbisë t’i tërheqë trupat nga kufiri, duke e quajtur zhvendosjen e tyre “zhvillim shumë destabilizues”.
Bashkimi Evropian i bëri thirrje të njëjtë Serbisë një ditë më vonë, të shtunën, përmes shefit të vet të diplomacisë, Josep Borrell.
“I bëjmë thirrje Presidentit Vuçiq dhe institucioneve të Serbisë që menjëherë të tërheqin të gjitha trupat ushtarake nga vija kufitare me Kosovën dhe të mbyllin dhe demilitarizojnë 28 bazat e përparme ushtarake dhe 20 bazat e xhandarmërisë që për vendin tonë paraqesin kërcënim të përhershëm”, thuhet në njoftim.
Qeveria e kryeministrit Albin Kurti e quajti këtë lëvizje të Serbisë si një hap të radhës nga ajo “për të kërcënuar integritetin territorial të vendit tonë dhe gjithashtu prezencën ushtarake ndërkombëtare në Republikën e Kosovës.”
Serbia i ka mohuar akuzat e Kosovës se ajo është përfshirë në këtë sulm të cilësuar si terrorist nga autoritetet kosovare.
Përgjegjësinë për organizimin e sulmit e mori Millan Radoiçiq, nënkryetar i deritashëm i Listës Serbe, partisë më të madhe të serbëve në Kosovë.
Gjatë këtij sulmi u vranë tre sulmues, ndërsa tre të tjerë u arrestuan dhe u paraburgosën.
Policia e Kosovës, po ashtu e gjeti dhe konfiskoi një arsenal jashtëzakonisht të madh armësh pas sulmit.