Vatikani: Gjendja shëndetësore e Papës vazhdon të jetë kritike
Papa, 88 vjeç, ka kaluar natën e dymbëdhjetë në spitalin Gemelli të Romës, që njëherësh paraqet qëndrimin më të gjatë të tij në spital.
“Kushtet klinike të Atit të Shenjtë vazhdojnë të jenë kritike, por stabile”, u tha në njoftimin e fundit të lëshuar nga Vatikani.
Një zyrtar i Vatikanit, i cili foli në kushte anonimiteti për mediat më herët gjatë së martës tha se Françesku po ushqehet normalisht, po lëvizë në dhomën e tij të spitalit dhe po vazhdon trajtimin.
Vatikani po ashtu njoftoi se Françesku është takuar me numrin dy të Kishës, kardinalin Pietro Parolin dhe zëvendësin e Parolinit të hënën.
Në njoftim u tha se ata diskutuan për punë të lëna pezull sa i përket çështjeve që lidhen me shenjtërimin. Vatikani tha po ashtu se disa emërtime të reja kërkojnë miratimin e Papës.
Të hënën Vatikani tha se gjendja shëndetësore e Papës vazhdon të jetë kritike, por ai kishte shfaqur “një përmirësim të lehtë”, duke shtuar se problemi me veshka, për të cilin fillimisht u raportua në fundjavë, nuk ishte gjë shqetësuese.
Pneumonia e dyfishtë është një infeksion serioz i dy mushkërive që mund të shkaktojë inflamacion dhe të vështirësojë frymëmarrjen. Vatikani ka thënë se infeksioni i Papës është “kompleks”.
Françesku, që është udhëheqësi i Kishës Katolike që nga viti 2013, në dy vjetët e fundit është përballur me probleme shëndetësore. Ai është i prirë të ketë infeksione në mushkëri, pasi kur ishte i ri i ishte hequr një pjesë e mushkërisë.
Teksa Papa po vazhdon qëndrimin në spital, mijëra persona u mblodhën të hënën në Sheshin e Shën Pjetrit për t’u lutur për shëndetin e tij.