Шарҳи раёсати вазорати корҳои дохилӣ дар вилояти Суғд
Мақомоти пулис бо ироаи як иттилоияи расмӣ ба Радиои Озодӣ рӯзи 5 феврал бозгашти сокинони минтақа аз Сурияву сарҳади Туркия ба ватан ва дубора бозгаштани бархе муҳассилини донишгоҳҳои динии кишварҳои хориҷӣ бо даъвати волидайн ва мақомот ихтиёран ба вилояти Суғд баргаштаро шарҳу тавзеҳ дод.
"Ба ҷуз як тан дигар касе аз богаштагон аз Сурия ба ҷавобгарии ҷиноӣ кашида нашудааст."
Биноба иттилои мақомоти пулис, ин 9 нафари аз кишвари ҷангзадаи сурия ба Тоҷикистон ба ихтиёри худ фироркарда 3 нафар сокини ноҳияи Ғафуров, 3 нафари дигар аз ноҳияи Спитамен, 2 тан аз Конибодом ва 1 нафар сокини шаҳри Гулистон (Қайроқуми собиқ) мебошанд. Ба гуфтаи Қудратулло Назарзода, сардори Раёсати корҳои дохилии Суғд танҳо як тан аз бозгаштагон, ки дар ватан "дубора сокинонро барои иштирок дар муқовиматҳои мусаллаҳона дар кишварҳои хориҷӣ даъват кард", ба ҷавобгарии ҷиноӣ кашида шуд ва алайҳаш мутобиқи Моддаи 401 - 1: "Ҷалб ва иштироки ғайриқонунии шаҳрвандони Ҷумҳурии Тоҷикистон ва шахсони бешаҳрванд дар воҳиди мусаллаҳ, задухӯрди мусаллаҳона ё амалиёти ҷангӣ дар қаламрави дигар давлатҳо"парвандаи ҷиноӣ боз гардид. Дигарон аз ҷавобгарии ҷиноӣ озод гардида, дар ватан домони зиндагии оромона аз сар гирифтаанд.
Ӯ гуфт, зеро қонунгузории Тоҷикистон шахсеро, ки ихтиёран "аз иштирокиғайриқонунӣ дар воҳиди мусаллаҳ, задухӯрди мусаллаҳона ё амалиёти ҷангӣ дар ҳудуди дигар давлатҳо то қатъ гардидани фаъолияти воҳиди мусаллаҳ, анҷом ёфтани задухӯрди мусаллаҳона ё амалиёти ҷангӣ даст мекашад, агар дар кирдори ӯ аломатҳои таркиби ҷинояти дигар мавҷуд набошанд", аз ҷавобгарии ҷиноятӣ озод менамояд.
"Соли 2017: 14 донишҷӯи суғдӣ аз донишгоҳҳои динии хориҷи кишвар ба Тоҷикистон баргардонида шуданд"
Раёсати корҳои дохилии Суғд мегӯяд, аз охири моҳи марти соли 2017 то январи 2018 14 сокини шаҳру ноҳияҳои минтақа аз таҳсил дар макотиби динии кишварҳои хориҷӣ, назири Миср ва Саъудӣ ба Тоҷикистон баргардонида шуданд. Ин сокинон аз шаҳру навоҳии зер баргаштаанд:
Бобоҷон Ғафуров - 4 нафар,
Гулистон, Мастчоҳ ва Панҷакент - 2 нафарӣ,
Хуҷанд, Исфара - 1 нафарӣ,
Ашт ва Кӯҳистони Мастчоҳ -1 нафарӣ.
"38 муҳассил бозгаштанд. Вале на ба хотири иштирок дар ҷанги Сурияву кишварҳои дигар."
Бо ин ҳол, бар пояи маълумоти пулис, боз ҳам дар дар макотиби динии хориҷи кишвар 59 донишҷӯи дигари суғдӣ боқӣ мондаанд. Ҳамин манбаъ мегӯяд,38 нафари онҳо баъди баргаштан ба Тоҷикистон дубора ба кишварҳои хориҷии тарккардаи худ бозгаштаанд.
Мақомоти пулис ин сокинони умдатан ҷавон мегӯянд,ин афрод на ба иштирок дар ҷанги Сурияву кишварҳои ҷангзада, балки умдатан ҷиҳати кор ва идомаи таҳсил ба кишвари қаблии худ баргаштаанд.
Пулиси Суғд мегӯяд, 23 донишҷӯи собиқи макотиби динии кишварҳои хориҷӣ, ки 6 нафари онҳо боре ба ватан барнагашта, 10 нафарашон дубора баргашта ва 7 тан баъди бозгашт ба Тоҷикистон даст ба аъмоли хусусияти террористӣ - экстремистидошта задаанд,расман таҳти ҷустуҷӯи ҷиноӣ қарор додааст.
Эмомалӣ Раҳмон, раисҷумҳури Тоҷикистон моҳи марти сол гузаштаи 2017 дастур дод ҷавонони тоҷике, ки дар Донишгоҳҳои динии хориҷи кишвар таҳсил мекунанд, ба ватан баргардонида шаванд. Ба ақидаи мақомоти тоҷик, эҳтимоли гумроҳ шудану ба доми тарғибгарон афтидан ва ба сафи ҷангиёни тундрав, мисли "Давлати исломӣ" афтодани онҳо зиёд аст.
Мақомоми пулиси Суғд мегӯянд, айни ҳол барои ихтиёран ба ватан баргардонидани 59 нафар сокинони суғдии аз таҳсил дар мактабҳои динии хориҷи кишвар, мисли Саъудиву Миср барнагашта ва 23 нафари таҳти ҷустуҷӯи ҷиноӣ қарордошта " бо волидайн ва пайвандони онҳо корҳои фаҳмондадиҳӣ" - ро идома медиҳад.