Қазоқистон таъсиси "пойгоҳҳои низомӣ"-и ИМА дар соҳили Каспийро рад кард
"Хоҳиш мекунем, ба ин хабарҳо бовар накунед, асос надоранд",- омадааст дар изҳороти сафорати Қазоқистон, ки 26 апрел нашр шуд.
Тайи як ҳафтаи ахир як қатор расонаҳои русӣ навиштанд, ки гӯё нирӯҳои дарёии ИМА аз бандарҳои Қазоқистон дар баҳри Каспий истифода карда, аз ҷумла дар ин кишвар пойгоҳи низомӣ низ таъсис додаанд.
Сафорати Қазоқистон мегӯяд, ин хабарҳо баъди ворид кардани тағйиру иловаҳо ба созишномае пайдо шуданд, ки Остона 20 июни соли 2010 бо Вашингтон дар робита ба транзити борҳои махсус ба Афғонистон имзо кард. "Инҷо сухан дар бораи талошҳои ҷомеаи ҷаҳонӣ барои мусоидат ба ҳалли мушкили Афғонистон меравад", - зикр шудааст дар изҳорот.
Порлумони Қазоқистон ҳафтаи гузашта бо тағйири созишномаи мазкур иҷозат дод, бандарҳои Актау ва Курики ин кишвар ба масири транзитие шомил гарданд, ки ба воситаи он ба ё аз Афғонистон бори махсус интиқол дода мешавад.
Дар иттилоияи сафорат ҳамчунин зикр шудааст, ки Русия низ пештар бо ИМА созишномаи ҳамсонро ба имзо расонда, дар интиқоли борҳои махсус иштирок карда буд.