Манбаъ: президентон дар Тошканд 23 санади нави ҳамкорӣ имзо мекунанд
Дар ҷараёни сафари президенти Тоҷикистон ба Узбекистон қарор аст 23 санади нави ҳамкорӣ ба имзо расад. Як манбаъ дар ҳукумати Тоҷикистон ба хабаргузории Азия-Плюс гуфт, ки сафари Эмомалӣ Раҳмон ба Тошканд рӯзҳои 17 ва 18 август дар назар гирифта шудааст ва ин нахустин сафари президенти Тоҷикистон ба кишвари ҳамсоя дар чаҳорчӯби як сафари расмӣ дар беш аз 20 соли охир хоҳад буд. Яке аз санадҳое, ки қарор аст дар ҷараёни ин сафар ба имзо расад, ҳамкории ду кишвар дар амри муқобила бо хатарҳои беруна мебошад, менависад оҷонсӣ. Дар миёни дигар санадҳо – созишномаи ҳамкорӣ дар бахши кинематография, ҳамкории хадамоти ҳавосанҷӣ, аломатгузории марзи ду кишвар ва дигарҳо мебошад.
Сафари президенти Тоҷикистон ба Тошканд панҷ моҳ баъди сафари расмии раиси ҷумҳурии Узбекистон Шавкат Мирзиёев ба Душанбе сурат мегирад. Дар ҷараёни сафари моҳи марти соли ҷорӣ миёни ду кишвар 27 санади ҳамкорӣ имзо шуд ва дар миёни созишҳои ҳосилшуда – ҳақи сафари бидуни раводид ба қаламрави ҳамдигар дар муддати 30 рӯз, роҳандозӣ шудани тиҷорати наздимарзӣ, ҳал шудани баҳси атрофи сарбанди Фарҳод ва дигарҳо мебошад.