Ташкили Эътилофи нирӯҳои мухолифини тоҷик дар Варшава
Санадро намояндагони чаҳор созмони мухолифин дар хориҷа, ки ҳизби феълан дар Тоҷикистон мамнӯи наҳзати исломӣ низ шомилаш ҳаст, имзо гузоштанд.
Ташаббускорон гуфтанд, ки эътилоф марбут ба чаҳор созмони имзокунанда нест. Онҳо гуфтанд, дар ҳоли ҳозир ин чаҳор созмон барои ташкили эътилоф иқдоми амалӣ карданд ва дигарон метавонанд ба он бипайванданд. Ҳадаф аз ташкили эътилоф сарҷамъии нирӯҳои мухолифин, рияои ҳуқуқи башар, рушди демократия ва интихоботҳои озоду шаффоф гуфта шудааст.
Масъалаи ташкили эътилоф ё иттиҳоди нирӯҳои мухолифини тоҷик беш аз як сол боз идома дорад. Қаблан дар нишасти Дортмунди Олмон низ ин масъала баррасӣ шуда буд.
Дар ҷараёни масъалаи ташкили эътилоф намоядагони “Гурӯҳи 24” ва Анҷумани нирӯҳои созандаи Тоҷикистон ҳам иштирок доштанд. Аммо баъдан ин ду созмон гуфтанд, ки шомили эътилоф нахоҳанд шуд.
Тоҷикистон Ҳизби наҳзати исломиро соли 2015 созмони мамнуъ ва террористӣ эълон кард. Даҳҳо узви ин ҳизб боздошту ба муҳлатҳои тӯлонӣ зиндонӣ шудаанд.
Раҳбарияти ҳизб аз соли 2015 боз дар хориҷа қарор дорад.